الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

واحة الإبداع.. مش باين

واحة الإبداع.. مش باين
واحة الإبداع.. مش باين




يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى:    
[email protected]

اللوحات للفنان منير فهيم


مش باين


كتبت: دينا الدخس
«من كتاب: وخزات خفيفة»


عايش مدّفى بالعتمة ومش باين
مركب وش على وشى بلون عايم
وباضحك فى وشوش عيرة كما النايم
ساعات أكون كما الرهوان، ساعات كانن
باعولى كلام على جناحات معدية
وضاع فى الهوا ويّا المنادية
وجيت أصرخ وجنبى النار والحرقة
ولسه برضه مش باين
عايش فى العتمة كالخفاش ومش طايق
بصيص النور من الكذاب وم العايق
ونظرة خبيثة مع بسمة ملوية
وبحر سواد جوه قلوب مصدية
عايش فى العتمة مستغنى وبغنى
وأجرب أكون لنور الشمس مستنى
لا بيوصلى نورها ولا بتسمع غنا قلبى
عايش فى الكهف متونس بصفارة
ساعات تبكى وساعات تكون فرحانة
يا عينى ياللى شفت الموت
ولسه فى الحياة بتموت
وبتمنى حاجات جواك بصفارة!
وجيت أجرب يمكن أفهم العادة
طلعلى صوتى بيلومنى بنغم سادة
ولسه بدور ع الطفل اللى جوايا
وبنده على طيرى اللى كان ويايا
يجيلى ساعات بخطوة بطيئة حيرانة
ويرمينى بنظرة لوم ويمسح دمعة هربانة
ويبعد تانى ويسيبنى لموج حزنى
وأرجع تانى للعتمة وأشيل وشى
ولسه معاها أنا عايش ومش باين