يوميات شيماء وعباس

وطنية عباس


طبعا زى أى اتنين لسه متجوزين الناس بتيجى تزورهم وتمشى لازم يعملوا حاجة تسليهم بليل، وطبعا محمد عشان وطنى بزيادة فقرر يزود الحس والانتماء الوطنى عندى ويفرجنى على كل المسلسلات والافلام الوطنية.
مسلسل على الزيبق خلص فى يومين بالضبط، وفيلم عمر المختار والناصر صلاح الدين اشتغلوا ورا بعض لدرجة ان اللاب لو بينطق كان قاله ارحمنى من وطنيتك اللى ظهرت عليك مرة واحدة.
ومن حظى الحلو أن بعد أسبوعين من جوازنا كنا داخلين على شهر أكتوبر ولاقيت مسلسل «رأفت الهجان» شغال فى كل قنوات التليفزيون لدرجة انه كان بيتفرج عليه على 7 قنوات فى نفس الوقت، الغريب فى كل ده ان مفيش أى حاجة شدتنى اتفرج عليها وكنت بسيبه وانام لكن هو لسه مكمل عادى جدا.