رعــشــة

يا أول دمعة فى الأحضان
وآخر فقرة فى الليلة
ماعادش بيفرق النسيان
ولا الآآآآآهة
ولا الويلة
ياشيلة قلبى وقت الخوف
وكسرة نَفسِى لماّ تحن
تئن الإيد من الذكرى
وبُكرة يوَحِى شمسُه تئن
وتبقى العتمة فوق كتفي
بتوجعنى
وتبقى الرعشة فـ ضلوعي
بتفزعني
نسيت الشوق !!!
ولهفة عينى فـ الشِدّة
وإيه يعني
ماتنسى كمان
وخلّى الروح بقى تسكُن
بلا تنهيد
ياأول حَد حبيتُه
وحسيتُه نخيل وشروق
تروق الدُنيا يوم يصفى
وبالُه يروق
يفوق إحساسى م الغفلة
وجرحى يفوق جراح الناس
بإيدك تكتب القفلة
وترسم وشى فـ الكراس
بلا معنى
ماعادش الحلم هايسعنا
ولا لهفة تعيشنى بُكا وحرمان
يا أول دمعة فى الأحضان
ماعادش بيفرق النسيان

 

شعر :
رشا الفوال
المنصورة