الخميس 28 مارس 2024
رئيس مجلس الإدارة
هبة صادق
رئيس التحرير
احمد باشا

ابداع




كانت روزاليوسف دائما رائدة فى إثراء الصحافة المصرية بفن الرسوم الصحفية، وتبني وتقديم شعراء ورسامين هم الرواد «الآن» بدأوا مشوارهم الإبداعى على صفحاتها ثم أثروا بعد ذلك الصحافة المصرية والعربية.
 
 
 وحرصًا منا على استكمال دورنا فى الريادة والتميز نقدم هذه المساحة الأسبوعية لإنعاش ذاكرة قرائنا بالرواد فى هذا المجال «رسمًا وشعرًا»
 
أحنا التلامذة
 
يا عم حمزة، 
احنا التلامذة. 
جن وبلاوى مسيّحه من غير مؤاخذه 
نكبر ما نكبر، 
الله أكبر. 
طول الزمان ع الامتحان داخلين مبارزة! 
هل من مبارز؟ 
 هل من مناجز، 
هل من معارك فى البلد دى، لسه عايزة؟ 
هل من منادى؟ 
ونفير جهادى 
قال لك: أجل!.. لسه العجل فى رمله غارزة! 
لسه ف طريقنا للآمال، 
والرملة من كل جهة. 
زقه مع زميلكم جمال، 
يا عقولنا يا متنبهه! 
الرملة حلوة ع البلاج، 
حلوة على باب الفرح، 
لكن لحد كده وبلاش، 
أَحسن شعورى بينجرح. 
اسفخص على لون الاصفرار 
والفقر، والخوف، والمرض 
ما شفته إلا ودمى فار، 
وحلمت بيه زال، وانقرض. 
كابس علينا الشىء ده ليه؟ 
هو انجليز..؟ 
ولا تتر؟ 
دوكهم خطر، قمنا عليه، 
رياح ما خلتلوش أَتر. 
كان برضه أمشير زى ده، 
..كان برضه أَمشير زى ده، 
كان برضه فبراير كده، 
قمنا جموعا حاشدة، 
سلاحنا أَنشودة فدا.. 
احنا الجواب، وإحنا الندا، 
وإحنا التلامذة المنجدة.. 
يا عم حمزة ما شتناش؟ 
..الدنيا شافت دمنا، 
حنّه، على ايدين أمنا، 
حلفت يكون عيد باسمنا، 
عيد ابتدا ولا انتهاش.. 
يا عم حمزه، 
(لا ماليف) وهمزه 
لأَ.. مش عاوزين عيشة وارثين 
ولا دنيا جاهزة. 
ده ابوسد عالى، 
سهران ليالى، 
زى التلامذة ف الامتحان.. يا عم حمزه.
 شعر صلاح جاهين
 
 
الثانوية العامة
 
 
ياصم صم ياثانوية....... ياعامة يا أم العقل أصم 
مالك كدة مستقوية.......وكاتمة عالأعصاب والدم
إش إنجليزى وجيولوجيا.......وكيميا أحياء على فيزيا
ورياضة من عصر الرازى.......ورياضة أحدث لينا رازية 
ياحشر فى الانفخ يلبخ .......يانشر فى الاعصاب والمخ
الدنيا فوق روسنا بترخ....... فلوس دروس ونفوس نافقة  
مالك ومال مستقبلنا .......ده احنا أملنا فى عملنا 
وعملنا رايح قوى عاملة ....... والميرى هوالقبالنا
علمى رياضى وعلمى علوم.......أدبى فى علم الغيب معلوم
وكلنا دفع المعلوم....... دروس خصوصى ولم فى لم 
أحلامنا تايهة وأمالنا ....... زى النعام تحت رمالنا 
عنق الزجاجة فى رقبينا....... وبقينا خيالات لخيالنا 
ياهل ترى بكرة زبادى....... ولا مغبر ورمادى
بختك يا أبوبخيت حادى بادى....... شقع بقع مخك ينعم 
ياصم صم ياثانوية....... ياعامة يا أم العقل أصم 
مالك كدة مستقوية ....... وكاتمة عالأعصاب والدم
  شعر شوقى حجاب
 
 
جرس الفسحة
 
جرس الفسحة ضرب ضرب
صوته كله طرب طرب
الحصة للقراية 
والفسحة للهواية
وللنشاط المدرسي
جرس الفسحة ضرب ضرب  
بيجيبلنا صوت الجرس الإبرة والخيط والخرز
نعمل حاجات ومحتاجات مطرزة تل وخرز
متخصصين ف السجاجيد 
ومعانا صنعة ف كل إيد
يا أيها الملك السعيد 
شوف العقد شوف الغرز
جرس الفسحة ضرب ضرب  
اجمل نشاط يعمل نشاط يعمل سعادة وانبساط 
يعمل رياضة ف الهوا 
والشمس والخضرة بساط 
وانا الجرس بيدقلي 
ويقوللى يا حلوة ادخلى 
يا غاوية تدبير منزلي
حاسبى ده فى ريحه شياط 
جرس الفسحة ضرب ضرب
 
   شعر صلاح جاهين
 
تلاميذ

 
إحنا تلاميذ مدارس 
طالعين والرب حارس 
زى الربيع نرعرع 
من قبل شهر مارس 
وادينا لبسنا مرايل 
وصحينا فى عز البرد 
وادى اصغر واحد شايل 
الشنطة وحيله اتهد 
وادينا اهه بنتحايل 
عايزين من حد الرد 
وميثاق الطفل أهوقايل 
عن حق الطفل بجد 
عايزين التختة مريحة 
وكتاب فيه كلمة صحيحة 
ورسوم ألوانها صريحة 
عايزين الورد أبوريحة 
وجنينة وأرض فسيحة 
عايزين لعبة ومرجيحة 
عايزين نتعلم لكن 
من غير ولا نفس جريحة 
عايزين مسرح وفنون 
ومدرس قلبه حنون 
وقانون قدامه نكون 
الكل مواطنون 
عايزين سينمات ومعامل 
عايزين كلنا نتعامل 
بكرامة وذوق ونزامل 
بعضنا ونعيش ونجامل 
ونكون مثقفين 
واعيين متفتحين 
والمختلف معانا 
حنقوله يا أهلانين 
وحنرفع الجباه 
ونزرع الأمل 
ونفرح بالحياة 
ونمنع الكوارث 
ما إحنا تلاميذ مدارس 
 طالعين والرب حارس 
زى الربيع نرعرع 
ونطلع شهر  مارس 
 
 شعر شوقى حجاب
 
كل أحياء البلد أحياء مدارس
 
 
سبت حد اتنين تلات أربع خميس 
ميت حلاوة نصطبح بالتلاميذ 
يابا سعد ويابا عيد 
الجرس فى المواعيد 
يابا سعد ويابا كامل 
كل يوم الفجر كامل 
يطلعوا لابسين مرايل 
ورد شايل 
الكتب والكراريس 
واللى زاد البركة 
مدرسة مشتركة 
القديم حمل امانة 
للجديد تحت سمانا 
ستى عيشة تقول حدانا 
دار حضانة 
يا عروسة يا عريس 
احبى واكبر يا ضني
الليالى محضنة 
والأمل نزهة نزيهة 
يا علوم بتهندسيها 
طل يا با كل جيهه 
بقت وجيهة 
نورت بالفوانيس 
كل أحياء البلد احياء مدارس 
سبت حد اتنين تلات اربع خميس 
ميت حلاوة نصطبح بالتلاميذ
 
شعر فؤاد حداد