الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

إبداع




شعراؤنا شموس سماء الإبداع، وان ظن البعض أن شموس شعرائنا تغرب برحيلهم عن الدنيا، لكن شموس الإبداع الباقية تنتظر كل يوم نورهم من جديد، تجمع صفحة إبداع اليوم قامتين كبيرتين من قامات شعر العامية بديع خيرى (1893 – 1966 ) وفؤاد قاعود ( 1936 – 2006) حيث يرى الكثيرون أنهما ظلما نقدياًو إعلامياً، فبديع خيرى حصل على دبلوم المعلمين وعمل مترجماً فى شركة التليفونات ثم معلماً، دخل عالم الشعر عبر الزجل عام 1914 لكن هوجم فتوقف قليلاً ثم عاد ليكتب المنولوج 1917 الذى ادخله عالم المسرح والسينما وكان يلقب بشاعر ثورة 1919 اما فؤاد قاعود الذى عاش فى القاهرة من بدايات الستينيات وحتى رحيله احتضنته مؤسسة «روز اليوسف» حيث عينه إحسان عبد القدوس فى وظيفة شاعر، وقد سكن قاعود كتاباته وترهبن فى محراب الزجل والشعر مبتعداً عن صخب الشهرة والتى وصفها « مهره حويطه تقلب المختال تجمع وترمح وتقزح باللى راكبها .
 
 وأشعارنا اليوم يصاحبها أعمال أحد أهم فنانى مؤسسة «روزاليوسف» الصحفية، هو الفنان محمد صلاح مأمون، أو «مأمون» كما كان يمضى أعماله الفنية، وهو أحد رواد مدرسة الرسم الصحفى المصرية، أعماله ذات طابع خاص، مثلما كان هو، عاش بيننا فنانا وإنسانا.
 
 
القلل القناوى
 
مليــــحة قوى القلل القنـــاوى
 
رخيـصة قوى القلل القنـــاوى
 
قــرب حــدانا وخد قلتــــــين
 
خســارة قرشك وحيـــــاة ولادك
 
ع اللى ماهواش من طيــن بـلادك
 
ده ابن بلــــــدك ما يبلفـــــــكشى
 
ما تعـــــدموشى ولا يعدمـــكشى
 
دمك من دمه ما يفرقكوا شى
 
الدنيـــــــا مالها يا زعبــــــلاوى
 
شـــقلبوا حـالها وين المـــــداوى
 
شوفوا البـلاوى ده البنـــك ناوى
 
يرفــع دعــاوى علشـــان يتـاوى
 
فى فلوسنا واحنا متقندليـــــن
 
مش بزيــــادانا بقيـــــــنا عـرة
 
وكل حــــــاجة من شــغل بــره
 
ده الفقــر طول قلــــع عينيــــنا
 
وخلا غيـــــرنا قلــس عليـــــنا
 
يادى الفضيحة يا ناس حرام
 
ولحــــــد ميـتى ما نفوقش واصل
 
والبيـه مقعمص قـــــــاعد يواصل
 
يشرب فى بيرة ويا منيــــــــــــرة
 
واحنا فى حيرة جـــــد وكبيـــــرة
 
انتعـــــنا بقى يا جـد الحسين
 
 



مارش الحزب الوطني
 
 
أوعى وشك أوعى رجلك      حزب أهل الكهف قام
 
نافخ إشداقه وقام لك            سبع فى جلد النعام
 
العتب ماهوش علينا             والمنام سلطان ياناس
 
كان معمص فوق عينيا         ربنا يجازى النعاس
 
خذنا هوه واحنا قوة              جامده فى دفع البلا
 
والمعارضة ولا مفاوضه      إلإ من بعد الجلا
 
كل اعضاء الحزب تاهوا      مين يلم اللجنة مين
 
حاجة تكسف انما هو           نعمل إيه فى الزواغين
 
عم حافظ صار محافظ         عالفسح والحمامات
 
حادى بادى فى الخيبا دى      عالسودان والملحقات
 
مين عنده أسطول للإيجار
 
مصر استقلت من كام يوم         على عهدتى وانا الرواى
 
إطوى اللحاف ياخم النوم           ياما الشخيرجر بلاوى
 
الدنيا كوم وبلادك كوم             سايبها ماشية أللاوى ؟
 
مابقاش يليق لك أكل الدوم         والناس بتاكل سنطاوى
 
 ياباشا هات اللوح أمال             وأقر الف فتحة وشده
 
عسى الله تتهندس الاحوال         وشويه من هات ده لخده
 
يعينوك قنصل جنرال               لمصر عند ملك جده
 
وماله يعنى ياريتها تدوم            بدال قعادك فى قهاوى
 
مصر استقلت من كام يوم          على عهدتى وانا الراوى
 
تفتح وكاله وتبقى سفير             وان جالك الهوى شبرقجى 
 
تركب اوتومبيلك بنفير              ومعاك مترجم وياسوقجى
 
يامطلع الدلو من البير                ماتطلعوشى سفللأجى
 
لا تبقى حوسة ودوسة ولوم         لو نفضوا جراب الحاوى
 
مادام حايبقى لنا قناصل           عراق عجم دوكة حجاز كار
 
هلبت بكرة حانتفاصل              على دردنوط عند النجار
 
القصد تحصيل الحاصيل          مين عنده اسطول للأيجار
 
ونجيب لمصر معلم عوم           أميرال حدق مش غلباوى
 
مصر استقلت من كام يوم          على عهدتى وانا الراوى
 
 
لذة الحكمة المهولة
 
لذة الحكمة المهولة
 
شرحها بلغة الشوارع
 
حاجة يفهمها بسهولة  
 
الصنايعى والمزارع
 
أما إيه يعنى البطولة
 
فى اشتقاق ماضى ومضارع
 
إحنا جريدتنا العمولة
 
تجعلك ياابو لبدة بارع
 
 
الصدمة
 
لو نزلت المحروسة ملفوفة القوام
 
أم العيون بنفسجى
 
من قصرها العالى وشاورت لى
 
لوحدى من دون الأنام
 
حأغض بصرى
 
ومش حرد السلام
 
علشان أنا من سنة
 
نفضت إيدى من الغرام
 
***
 
لو دندن البلبل بصوته الرخيم
 
وضم عوده تحت جناحاته
 
وكنت أنا وحدى النديم
 
حأقفل ودانى فى وش أنغامه
 
وأهيل عليه التراب
 
علشان أنا من سنة
 
شفت الغنا كداب
 
****
 
لو اصطفانى المضحك المشهور
 
بلعبه وأتشقلب قصادى
 
حيطل من عينى الغضب
 
ومستحيل أبتسم
 
مهما المهرج هاص و زاط
 
علشان أنا من سنة
 
عرفت إن الضحك ابن العياط
 
****
 
لو خصنى الفيلسوف
 
بحكمته المحفورة فى ذهن الزمن
 
وبدأ يوجه لى الحديث
 
حأخد طريق غير طريقه
 
وأمشى بعيد عن ندوته والزحام
 
علشان أنا من سنة
 
مؤمن بلا جدوى الكلام
 
 
****
 
لو أتحشى فرشى بريش نعام
 
ولو ستارة غرفتى
 
مطرزينها بأجمل الأحلام
 
محال أغمض عيونى
 
مهما يزيد لومى
 
علشان أنا من سنة
 
ضيعنى نومى
 
***
 
 
لو النجوم تنزل وتمشى فى الشوارع
 
ولو العمارات تطير
 
ولو الضفادع فى الشتا عرقت
 
والجو فى أغسطس أصبح مطير
 
ولو الحمير أتكلمت بفصاحة
 
والنملة صبحت فى ضخامة الفيل
 
مش حأندهش
 
بعد اللى فات
 
علشان أنا من سنة
 
إحساسى بالدهشة مات 
 
 
 
الأعـــــداء
 
للنور ولائى وأعدائى سبع ظلمات
 
المنع م الشوف وزرع الخوف فى الطرقات
 
وعتمة الروح إذا ما عششت ع الذات
 
والجهل باللى حيجرى والسكوت ع الذل
 
وصلصلات القيود لما تسود الكل
 
وكره مخصوص أكنه للعدو السابع
 
أعتى من التانى والسادس وم الرايع
 
ده الحب إذ يجلبوه م السوق مشتريات
 
 
المـوقــــعـة
 
جلبت بوصة طويلة قد رمح كبير
 
ورشقت فى طرفها دبوس مصدى حقير
 
وببسكليته بتلات عجلات لطفل صغير
 
نزلت وسط الميدان باصرخ ومش هازل
 
هل من منازل ما بينكم للدما بازل
 
ورغم إن الجميع ضحكوا على الصفين
 
كريت عليهم جروا ... واتكعبلوا ألفين
 
ورجعت تارك ورايا م الضحايا كتير
 
 
 
صراع
 
 
الخلق على الاموال فى صراع .. وتعب وصداع
 
وانا بعدت عن الاوجاع وعن الصراعات
 
يهمنى قولى المعروف يظهر مكشوف
 
واظل على رأيى الموصوف كل السنوات
 
مش كل عصر البس له قناع واتشرى واتباع
 
وفى يوم اقب ويوم ف القاع زى العملات
 
انا ليا سعر لكنه وحيد .. سعر الاجاويد
 
مهما السلع تنقص وتزيد هو فى ثبات
 
وشرفى ومقامى الشخصى شئ مستعصى
 
على الغريم .. لكن نقصى حسن النيات
 
مشيت بقلب سليم مفتوح وصادفت جروح
 
لكن محيت بأصالة الروح كل العقبات
 
واللى فى نفسه اصيل وكبير لو وحده يسير
 
يرهب كانه فى حشد غفير ويثير رجفات
 
 
 

 
العــــزلة
 
 
داريت بكوخى رضوخى للسنين البور
 
وخلقت ويا المكان لغوة لسان وشعور
 
وجعلت بالفكر مرتع بكر فى المنظور
 
وصنعت والبدر غافى كل أطيافى
 
ولا كانش رغم انصرافى سمتكم خافى
 
أرسل شريط الرؤى فى وحدة موصولة
 
وتو ما تفك منى يد مغـــلولة
 
أقطع بمقطع يسطع من حروفه النور!