الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

ابداع




 
 
 
شعراؤنا شموس سماء الإبداع، وأن ظن البعض أن شموس شعرائنا تغرب برحيلهم عن دنيانا، لكن شموس الإبداع باقية ننتظر كل يوم نورها من جديد، تجمع صفحة أبداع اليوم قامتين كبيرتين من قامات الشعر جمع بينهما وحدة المولد «محافظة الدقهلية « وارتباطهم بالميديا المسموعة والمرئية، وهم نجيب سرور ( 1932 -1978 ) وسيد حجاب الذى نحتفل معه هذا الأسبوع بعيد ميلاده، وهو مواليد المطرية -قرية الصيادين-، فليس غريبا عنه صيد جميل الصور وبديع  الكلام واقتناص أعمق الأفكار فى كلمات موسيقاها تهيمن على السامعين، درس حجاب هندسة التعدين فكان طبيعياً أن يبنى اسماً من الذهب والحديد ، تنبأ له صلاح جاهين منذ بداية الستينيات بمكانته اليوم فكان عند حسن التنبؤ.

أما نجيب سرور الذى لقب بـ( شاعر العقل ) درس الحقوق ثم تركها قبل التخرج والتحق بالمعهد العالى للفنون المسرحية الذى حصل منه على الدبلوم ، وعاش سرور حياة البؤس والإضطهاد فى صغره من بقايا الإقطاعيين فى قريته وفى كبره من اجهزة المخابرات حتى توفى فى مستشفى للأمراض العقلية عن 46 عاماً . 
 

شوك و ضل
 

 
أحب ما عليا

الشجرة أم شوك وضل!

الضل وحده يتلج الحشا.. يعلّ

والشوك يـِغلّ

...........

ما احبش القديسة

ولا اللى ما يعرف خلاف سجادة الصلا

براءة الملايكة ف ارض شايكة.. شىء يشل

وما احبش الخسية

ولا الفلاتى الزانى حتى ويا أحجار الفلا

خساسة النجاسة والنخاسة والسياسة وقلة الحساسة

شىء يذل

.. وأحب ما عليا

الشجرة أم شوك وضل
 

 
هنا القاهرة
 
هنا القاهرة الساحرة الآسِرة الهادرة الساهرة الساترة السافرة

هنا القاهرة الزاهرة العاطرة الشاعرة النيّرة الخيّرة الطاهرة

هنا القاهرة الساخرة القادرة الصابرة المنذرة الثائرة الظافرة

صدى الهمس فى الزحمة والشوشرة

أسى الوحدة فى اللمة والنتورة

هنا الحب والكدب والمنظرة

نشا الغش فى الوش والإفترا

هنا القرش والرش والقش والسمسرة

هنا الحب والحق والرحمة والمغفرة

وانا ف قلب دوامتك الدايرة بينا
 
بصرّخ بحبّك يا أجمل مدينة

يا ضحكة حزينة .. يا طايشة ورزينة

بحبّك واعفّر جبينى فى ترابك

واعيش فى رحابِك وأقف جنب بابك

جناينى أروى بالدم وردة شبابك

يا زينة جنينة حياتنا اللعينة

بحبّك يا بنت اللذين
بحبّك

 
البحر بيضحك ليه
 
 
 
البحر بيضحك ليه وأنا نازلة أتدلع أملا القلل

البحر غضبان ما بيضحكش..أصل الحكاية ما تضحكش!

البحر جرحه ما بيدبلش.. جرحنا ولا عمره دبل!

البحر بيضحك ليه.. وأنا نازلة أتدلع أملا القلل

مساكين بنضحك م البلوة.. زى الديوك والروح حلوة

سرقاها م السكين حموة

ولسه جوا القلب أمل!

البحر بيضحك ليه.. وأنا نازلة أتدلع أملا القلل

قللنا فخارها قناوى.. بتقول حكاوى وغناوى

يا قلة الذل اللى أنا ناوى ما أشرب ولو فى الميّة عسل

البحر بيضحك ليه.. وأنا نازلة أتدلع أملا القلل

ياما ملينا وملينا .. لغيرنا وعطشنا سقينا

صابريــن وبحر ما يروينا.. شايلين بدال العلة علل!

والبحر بيضحك ليه. وأنا نازلة أتدلع أملا القلل

فى بالى ياما وعلى بالى .. وإللى بيعشق ما يبالي

ما يهمينيش من عزالى .. يا حلوة لو مرسالى وصل!

والبحر بيضحك ليه.. وأنا نازلة أتدلع أملا القلل

بينى وبينك سور ورا سور.. وأنا لا مارد ولا عصفور!!

فى إيدى ناى والناى مكسور.. وصبحت أنا فى العشق مثل!

والبحر بيضحك ليه.. وأنا نازلة أتدلع أملا القلل
 

 
يادفعه راحت كام دفعه
 
 
 

يا خوفى ع الدفعة الجيَّة

يادمعه نازله م الشمعة

ورا دمعة بالنار مكويَّة

النار خيانة فى عز الضهر

آه م الخيانة وم الخاينين

لو ينغرز خنجر فى الضَّهر

الصدر يبقى صدر ياسين

وبهية تبكى ولا تخبَرّ

مين القتيل والقاتل مين

 وعرضحال واكتبى محضر

وكله ضد المجهولين

كلام يا دفعة مش معقول

ادينى عقلك واسمعني

قاتل و يصبح ليه مجهول

الشَّـارى كتفنى وباعني

يا دفعة يا أبو زيد يا أبو مدفع
متغاظ منشـن على سـينا

ياهلالى فى الغيط فى المصنع

فى الجبهة ليه قالوا جرينا ؟!

يا دفعة غيرك بيحارب

بالبنط الاحمر و الاعلان

وبيقلب المغلوب غالب

والكدب تقراه م العنوان

وديَّة الفانتوم خبطه

موجَّهة من أرض لجوْ

والحرب جد ماهش لعبة

ديتها فرقة تقول «هاوْ هاوْ»

وأساتذة ياما فى فن الحرب

خلو الجمل فات م الابره

واحنا يا دفعة فى آخر كرب

بكره خياطه ورا البكره

خليك كدا على خط النار

مصلوب يا كبدى فى الصحره

وادى الشـعار ينطح فى شعار

سكاكين بتدبح فى البقرة

حارب بشرط ماتهجمشى

ولو هجمت ماتضربشي

ولما تضرب ما تصيبشى

هوَّش يا دفعة وكل محشى

ويضربونا نروح نحتج

ونقول «يا هيئة» ضربونا

وكل يوم للهيئة نحج

ملعون ابوهم لأبونا

تعال شوف شارع سليمان

دكاكين تبحلق للدكاكين
وفيها خير اشكال والوان

ونص بلدك شحاتين

والجرسونيره فوق جرسونيرة

والفرش مفروش باللحمة

والسيرة فايحة فى الجيرة

والشرطة واقفة فى الخدمة

متاريس «نضال» عند جروبى

والامريكين .. ووراها شباب

يا خالق الخلق يا ربى

نسوان وليها ازاى إشناب ؟!

واقفين يا دفعة ورا ضهرك

وكل خنفس ولا خنجر

صياد وجاى جايب قدرك

« يهودى» يعنى ومتنكر

وزير سيادته واقطاعى

بقى اشتراكى فى غمضة عين

ياكل دراعك ودراعى

ويسرق الكحل من العين

والرأسمالى «مدير» مصنع

والاسم مصنع متأمم

ومين هايقرا ومين يسمع

والغيظ يا حسرة متلجَّم

وحضرته شايل دبابير

بالتورة تنهش فى اكتافنا

والحرب عنده زعيق وجعير

ياهلترى مين هايخافنا

ومجلس الشعب الميمون

وفلاحينه افندية

الاسطى فيه لابس ببيون

وشعاره «تحيا الملوخية»

يا دفعة راحت كام دفعة

يا خوفى ع الدفعه الجيَّه

يا دمعة نازلة م الشمعة

ورا دمعة بالنار مكوية !!
 

 تحت نفس الشمس
 

 
تحت نفس الشمس وفوق نفس التراب

كلنا بنجرى ورا نفس السراب

كلنا من أم واحدة.. أب واحد.. دم واحد

بس حاسِّين باغتراب

من حنان الحب هل الغل جانا

من مرارة الغل جلجل صوت رجانا

نبكى من الغل اللى بيعكر حياتنا

ولا من الحب اللى هدهدنا وشجانا

يا زمان الغربة ليلك بيحاصرنا

وفى ضلامه المر طاوينا وعاصرنا

بس طول ما الحب بيرفرف علينا

الجدور حنمدها ونصنع مصيرنا

■ ■ ■ ■

نفس الشموس بتبوس على روسنا

نفس التراب يحضن خطاوينا

طب ليه بنجرى ونهرى فى نفوسنا

وليه نعيش ناكل فى بعضينا

آدى الحقوق وآدى اللى طالبينها

والحق تاه فى الباطل البطل

لوقلوبنا تاهت عن محبينها

ونجومنا عالية بعيدة ما تنطال