عزت: كسيب.. ونفسى أتجوز.. والمصرى لو مأكلش يموت

 
 
«مصطفى» و«عزت» بيجمع بينهم السن والنوع والبلد اللى عايشين فيه حبينا نعرف أيه مساحة الاتفاق والاختلاف بينهم، وحدنا الأسئلة وطرحناها عليهم علشان ننول المراد، اللى هتلاقوه فى المواجهة دى
 
■   كلمنا عنك؟
 
- اسمى عزت يوسف، عندى 25 سنة، معايا دبلوم صنايع، انولدت فى كفر الشيخ واشتغلت مع والدى فى الارض لما كان عندى 12 سنة، بس لما خلصت ثانوى نزلت على مصر علشان ادور على شغلانة اجيب منها فلوس كويسة، فاشتغلت صنايعى فى محل كشرى.
 
■ وليه اخترت المهنة دى؟
 
- لأنى اكتشفت أن الشغل فى مجال المطاعم والأكل عموما بيكسب كتير عشان كده اتعلمت ازاى اعمل طواجن بجميع انواعها والكشرى، ورحت اشتغل في محل كشرى، لان الكشرى هو ملك الأكلات والمصريين كلهم من السفير للغفير بيحبوه حتى الأجانب بينزلوا مصر مخصوص عشان ياكلوه، أنا تقريبا بكسب في اليوم 60 جنيه وفى الشهر 1800 ويمكن أكتر من كده شوية يعنى راجل كسيب. 
 
 
■ بتعمل ايه لما بتبقى فاضى؟
 
- معنديش وقت فاضى، أنا باشتغل 12 ساعة فى اليوم يادوب أرجع أنام عشان أجى تانى يوم الشغل فايق ومركز وهو ده يومى بمعملش أى حاجة تانية غير الشغل.
 
■ الثورة اثرت على دخلك؟
 
- إطلاقا.. ده وقت الثورة كان المحل بيكسب أكثر من الأول، كان فيه شلل كتير بتيجي مع بعضها ياكلوا ويقعدوا يتكلموا فى حال البلد وهيعملوا ايه الفترة الجاية، مفيش حاجة المصريين بيحبوها قد الأكل، ممكن الواحد يبطل يعمل أى حاجة الا أنه يبطل ياكل وإلا يموت.
 
■ ايه علاقتك بالنت؟
 
- مليش علاقة انا بس بقرا فى الجرايد أى حاجة مهمة وشباب الجامعة عملين بها «بوليكة».
 
■ بتحلم بأيه؟
 
- أنا عايز اتجوز وبشتغل بجد علشان اقدر اكون نفسى، وفي نفس الوقت بدور على بنت الحلال اللي هتشاركنى حياتى وتعيش معايا على الحلوة والمرة وتستحملنى انا وشغلى.