الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

بنات × بنات




 

عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن   فيها عن أنفسهن وللحديث عن المشكلات والهموم والقضايا التى تشغل بالهن ويرفض المجتمع  فى  كثير  من  الأحيان  الاستماع  إليها. ويمكن التواصل والمشاركة فى هذا الباب عبر البريد  الإلكترونى: [email protected]
 

يا فرحة ما تمت
 
تخيلى معايا كده أم وأب كل واحد فيهم اتغرب عن أهله وعاش فى بلد بعيدة وكونوا أسرة  صغيرة وبنوتة وحيدة لا ليها أخ ولا ليها أخت.

حطى نفسك كدة فى مكانى: عايشة عمرك كله وحيدة لا اخت تشاركك حزنك او فرحك ولا اخ من سنك عاش فى جيلك  ويقف جنبك ويكون سندك بعد ابوكى، تخيلى كدة كل ده مش موجود عايشة فى الدنيا لواحدك ولو فى يوم من الايام الدنيا غدرت بيكى مش هتلاقى العيلة اللى كانت بتحتويكى، وفجأة كده تلاقى باباكى ومامتك داخلين عليكى يقولولك احنا الاسبوع الجاى هنروح نزور خالك.. وانتى تسمعى الخبر من هنا وتطيرى من الفرحة لحد ما يتحقق الحلم ويبقى حقيقة وتشوفيهم وتتكلمى معاهم و تحبيهم وتحسى فى وسطهم بالامان وتعرفى أخيرا يعنى ايه اهل وعزوة وترجعى بيتك وانتى واخدة جميع احتياطاتك من الدنيا اللى ممكن تفرقكوا تانى من "ايميلات لارقام تليفونات لفيس بوك" وتحلفى عمرك ما هتقطعى صلة الرحم تانى ويادوب تانى يوم تلاقى مامتك تدخل الأوضة بتاعتك ويدور بينكو الحوار ده:

الام: بصى يا بنوتة ولاد خالك دول لازم تبعدى عنهم وما تقربيش منهم كدة
انتى: نعم؟! ليه يا ماما عملوا ايه؟

الام: لا هم معمالوش حاجة شباب زى الفل

انتى: الله! امال ابعد عنهم ليه بس؟ انا على ما صدقت لاقيتهم.
الام : اصلهم شباب على وش جواز و انتى بنت برده على وش جواز

انتى : و ايه علاقة ده بولاد خالى اصلا دول زى اخواتى و انا زى اختهم.

الام: لا مافيش كده.. الناس تقول ايه لما يعرفوا ان بعد السنين دى كلها اننا بنقرب.
انتى: اولا: هية الناس مالها بينا اصلا، ثانيا: هيقولوا ايه يعنى؟
 
الام: بصى يا بنتى احنا مجتمعنا كده لما بيبقى فى اخ عنده بنات بيبعد عن اخوه اللى عنده شباب علشان ما يقولوش ان قربه من اخوه علشان عايز يجوز بناته لولاد اخوه  علشان كده انا بعدت عن اخوية الفترة الى فاتت دى كلها.

انتى: نعم؟! وبالنسبة لصلة الرحم الى ربنا امرنا بيها ننساها ونبعد علشان بس خايفين من كلام الناس؟ على اساس ان الناس دول بيبطلوا كلام اصلا؟ وهم الناس مالهم احنا حرين نعمل اللى احنا عايزينه وانا مش هبعد عن اهلى علشان الناس الى يوم ما اقع او ابقى وحيدة مش هلاقيهم جنبى وساعاتها كمان مش هلاقى اهلى اللى انا بعدت عنهم علشان فضلت الناس عليهم.

الام: مافيش حاجة اسمها مش هبعد وانتى لازم هتبعدى لان هيبقى صورتك فى عيونهم وعيون الناس انك بتقربى منهم علشان بترسمى وعايزه واحد منهم يتجوزك وكلامى انتهى والموضوع اتقفل ومافيش نقاش.

يااااااااااااااااه انتوا متخيلين مجتمعنا بقى مجتمع مريض ازاى؟
 
انتوا مدركين ايه الى  احنا فيه تخيلوا أن فكرة انتشار العنوسة وان البنات مش لاقية عرسان  دى مش بس بتقضى على كرامة البنت ونفسيتها لا دى كمان بتقضى على صلة الرحم بين الاهل كمان!

تخيلوا أن مجتمعنا بقى الخوف فيه من كلام الناس اقوى من اى صلة بتجمع بين الاهل والاقارب !!
 
 
 
 
كتبتها - رنا أحمد طالبة بكلية الالسن قسم اللغة الانجليزية جامعة عين شمس وهى ابنة مدينة بورسعيد الباسلة وتعشق البحر وتعلم اللغات الجديدة.