شروق: الاختلاط عادى.. وبفكر أتحجب.. ومش هرتبط غير رسمى
روزاليوسف اليومية
■ عرفينا بنفسك؟
- شروق شديد رابعة كلية ألسن جامعة عين شمس.
■ مرتبطة؟
- لا مش مخطوبة، ومش بقتنع بالارتباط بين الشاب والبنت قبل الخطوبة لازم الحاجة تبقى فى النور وبشكل رسمى وأهلى لازم يكونوا عارفين بأى حد عايز يتقدم لى ورغم أن أهلى مديينى الحرية فى التصرف فى حياتى إلا أن مش معنى كده أنى أعمل حاجة غلط لأن الحرية مسئولية.
■ إيه هى مواصفات فتى أحلامك؟
- يكون عنده مبدأ وأخلاقه كويسة يراعى ربنا فيا وأهم حاجة يكون دمه خفيف عشان مش بحب جو الكآبة ويكون كمان متفاهم وبيحبنى وبيحترمنى وبيحترم الناس كلها.
■ هل ليكى أصحاب أولاد؟
- أيوه وهما زمايلى فى الكلية وفى النادى ودول بعرفهم فى إطار جروب كبير بنات وأولاد، وبيكون فى حدود بينا وأنا متعودة دايما أعرف أهلى على أصحابى اللى انا اخترتهم وفيه أصحاب أولاد بييجو عندنا البيت وبنعزمهم على أعياد ميلاد أو مناسبات سعيدة زى السبوع وكده.
■ أيه رأيك فى الصداقة بين الولد والبنت؟
- مفيش فى مصر حاجة اسمها صداقة بين ولد وبنت لأن الأنتيم بين ولد وبنت ده مفهوم أوروبى لكن ممكن نقول زمايل أو أصحاب بحدود.
■ أيه رأيك فى الاختلاط بين الشباب والبنات فى الدراسة والعمل؟
- شيء عادى جدا كل واحد بيكون ليه دور بيعمله سواء فى الدراسة أو فى الشغل بالعكس ممكن الولد يساعد البنت فى حاجة مش قادرة تعملها والعكس ممكن البنت تكون متميزة فى حاجة فتساعد زميلها سواء فى الدراسة أو فى الشغل يعنى كل واحد بيؤدى دوره وفى الآخر بنكمل بعض.
■ فكرتى تغيرى من مظهرك؟
- دايما بافكر أغير من مظهرى يعنى لما دخلت الجامعة بدلت فى مظهرى ولبسى وبقيت ألبس بلوزات بكم ومفيش حاجة ضيقة ودلوقتى بيراودنى فكرة الحجاب نفسى ألبسه بس لسه ما أخدتش قرار فى الموضوع ده وبدعى ربنا يوفقنى وأقدر آخد قرار الحجاب.
■ هل تعتقدى أنك ممكن تكونى فتاة أحلام بعض الشباب؟
- أكيد طبعا طالما أنى بدور على واحد عقله متفتح يحترمنى ويحتوينى فأكيد فيه حد زيى بيدور على واحدة شبهى.
■ طب افرضى اتقدم لك واحد فيه المواصفات اللى بتحلمى بيها بس اشترط عليكى تلبسى حجاب هتوافقى عليه ولا هترفضيه؟
- لا طبعا هارفضه لأنى مش بحب العقليات دية قرار الحجاب لازم أنا اللى آخده من جوايا مش حد يشترطوا عليا وعمرى ما هوافق على حد بيفكر كده حتى لو فيه مزايا الدنيا كلها.
