الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

Face 2 face





أيمن وأحمد شابان درسا «التجارة» واحد شهادته متوسطة والثانى عليا، واحد شغال بياع عيش والثانى مبتكر، حاورناهما حول ظاهرة الاعتصامات فى مصر وتصاعدها قالوا:
 
أيمن: بياع عيش .. ويدعم الاحتجاج.. ومرسى مغيرش حاجة
 
 
■ عرفنا بنفسك؟
 
- أيمن رفعت، سنى 31 سنة، حاصل على دبلوم تجارة، وبشتغل بياع عيش، متجوز وعنده بنتين.
 
■  شاركت قبل كده فى احتجاجات بعد الثورة؟
 
- لا أنا شاركت فى الثورة من يوم 25 يناير ولحد اسقاط النظام، وكنت طول الـ 18 يوماً بنام فى الميدان مع المعتصمين، وبعد كده شاركت فى أحداث محمد محمود ومجلس الوزراء، غير كده ما شاركتش فى أى احتجاجات.
 
■  ليه أخذت القرار ده؟
 
- لأنى كنت بطالب بالتغيير رقم واحد، والمناداة بالعدالة الاجتماعية والحرية رقم 2، فأنا مثلا حاصل على دبلوم تجارة ومش لاقى وظيفة مناسبة ليا لحد دلوقتى، وملقتش قدامى غير الرصيف علشان أبيع عليه عيش، اضافة أنى مش بطولى أنا وأسرتى مكونة من 8 أفراد وعايشين فى أوضة واحدة، والمفترض أن الحكومة والدولة توفر لنا حياة كريمة وتدى للفقراء مساكن آدمية وترعاهم دا حقنا.
 
■  إيه تعليقك على استمرار المظاهرات والاعتصامات اللى عيشنها، فسياسة الرئيس محمد مرسى لم تأت بجديد، ومحققش أى حاجة من وعود الـ 100 يوم، وكل وعوده هى مجرد كلام، وحقوق الشهداء مرجعتش بعد اشهر من سنة ونص، علشان كده أنا مع المظاهرات حتى تحققت الثورة أهدافها ويحس الرئيس بأحوال الناس الصعبة.
 
 
 أحمد دياب



أحمد: مع الاعتصامات.. والبلد زى ما هى من أيام مبارك.
 
 
 
■ عرفنا بنفسك؟
 
- اسمى أحمد دياب، 24 سنة، خريج كلية تجارة، وشغال أستاذ موارد بشرية، ومؤسس مركز للابتكارات.
 
■  شاركت قبل كده فى احتجاجات بعد الثورة؟
 
- لا مشاركتش فى أى مظاهرات، لكنى كنت بدعمها جداً، وواثق فى نجاحها، وفضلت أن يكون ليا توجه ثان.
 
■  ليه أخذت القرار ده؟
 
- علشان مينفعش كلنا نخرج نتظاهر ونحتج فى وقت واحد، فقررت أحط مخطط للتغيير خاص بيا لكن على المستوى العلمى، فأسست مركزاً ابتكارات لتطوير البحث العلمى والاهتمام بالاختراعات، وهى فكرة تسعى للنهضة وتغيير مصر للأفضل.
 
■  إيه تعليقك على استمرار المظاهرات والاعتصامات لحد دلوقتى؟
 
- أنا معها جدا، وده أمر طبيعى، فالمظاهرات سببها عدم وجود تغيير ملموس على أرض الواقع بعد الثورة، فالرئيس محمد مرسى، ماشى  بنفس أسلوب مبارك، صوصاً فى اهتمامه بالشأن الخارجى على حساب الأوضاع الداخلية، ثم أن أى حد بيتظاهر أو بيدعو للاحتجاج هو مواطن له مطلب وبيدور على حقه فى أن يعيش حياة أفضل، إلا أنى متأكد أن الوضع ده مش هيستمر كثير.