بنات × بنات

 
عايزة عريس ولا .. لا.. عيب؟
 
هو عيب لما أطلب عريس من واحدة صاحبتى لو مثلا أخوها عجبنى أو أن اطلب عريس متفصل من مكتب زواج دى أكيد فكرة بتيجى على عقل كل بنت فاتها قطر الجواز أو حتى خايفة من أنه يفوتها بس يا ترى ده صح ولا غلط؟
 
يا ترى هو صح علشان المثل اللى بيقول أخطب لبنتك ولا تخطبش لابنك وده طبعا اللى اتعودنا عليه من أجدادنا العواجيز بس وياترى هو غلط علشان مش أخلاقنا اللى اتربينا عليها تقول إننا نطلب بكل بجاحة كده عريس ولا ده بقى شيء عادى فى ظل الظروف الصعبة اللى خلت الجواز مشكلة كبيرة قوى والأصعب الاستمرار فيه بس الغريب أن كتير بيقول أن ليه من حق الشباب أنه يختار البنت اللى تعجبه ويروح يتقدم لها والبنت لأ.
 
كمان بيقولوا مش عيب خالص أن البنت لو أعجبت بشاب معين أنها تقوله أنا شايفة فيك صفات كثير عجبانى وبتمناها فى الشخص اللى هأرتبط بيه وهو عادى ممكن يقول رأيه إذا كان مشجع لفكرتها أو لأ وممكن يلاقى فيها كمان اللى هو بيتمناه فى شريكة حياته وممكن يكون عايز يتقدم لخطوبتها بس امكانياته المادية ما تسمحش ليه بالارتباط وعلشان كده صرف نظر على أنه يواجهها ويعترف لها بالإعجاب ولكن لما هى صرحته بإعجابها بيه أحس أنها ممكت تستحمل ظروفه مادامت هى عايزاه وبعد كده ممكن التجربة تأخذ شكل الارتباط ولكن فى شاب آخر يرى أن البنت اللى تعمل كده تبقى بنت جرئية زيادة عن اللزوم ودى مش حاجة حلوة خالص فى البنت.
 
وفى بنات ممكن تقول إزاى أرخص من نفسى وأروح أقول لواحد أنت عاجبنى وعايزة اخطبك؟ ولو قولتله كده أعمل إيه لو هو طلع مش حاسس بمشاعرى أو مرتبط عاطفيا بواحدة ثانية أو مثلا قالى أنا بعتبرك زى أختى؟ أو قالى سورى أنا مش بفكر فى الارتباط دلوقتى وأنا مقدرش افتح بيت دلوقتى أو زى كثير من الشباب دلوقتى وقالى أنا مرتبى ميأكلش عيش ومش عايز أظلمك معايا؟
 
أنا شايفة أن لكل شخص رأيه الخاص به وعلينا فى النهاية أن نحترم آراء بعض ولكن إذا حدث ذلك على الشاب احترام مشاعر البنت دون استهزاء أو سخرية وكذلك بالنسبة للبنت عليها احترام مشارع الشاب وتقديرها.