بنات * بنات

 
عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن   فيها عن أنفسهن وللحديث عن المشكلات والهموم والقضايا التى تشغل بالهن ويرفض المجتمع  فى  كثير  من  الأحيان  الاستماع  إليها. ويمكن التواصل والمشاركة فى هذا الباب عبر البريد  الإلكترونى: [email protected]
 
كلمة حق
 
انا وغيرى من البنات ليل نهار بنتقد الشباب وشايفين ان كلهم خاينين وما يقدروش يبقوا مخلصين لوحدة بس وانهم عينهم زايغة و.. و.. و...
طب بالنسبة بقى للبنات الى عايشة علشان لما واحد يقولها انا معجب بيكى تقوله قشطة ويتصاحبوا ويجى واحد تانى يقولها نفس الكلمة وترد عليه نفس الرد وتصاحبه مع انها مصاحبة بس كله قشطة وتقابل التالت ويتصاحبوا وتبقى ماشاء الله بتكلم 3 فى نفس ذات الوقت وهوووووبا يظهر الرابع بس ده يتقدم لاهلها رسمى فتسيييب التلاتة وتجرى على الى معاه يجيبلها الدبلة والشبكة على فكرة:
 
- عيب اوى تصحابى واحد واتنين وتلاتة فى نفس الوقت
 
- عيب اوى تصاحبى تلاتة علشان كل واحد فيهم يخرجك مرتين فى الاسبوع وبكده تكونى خرجتى الاسبوع كله.
 
- عيب اوى تصاحبى تلاته علشان كل يوم كل واحد فيهم يكلمك بالساعات وبكده ما تحسيش بالملل.
 
- عيب اوى تصاحبى تلاته علشان كل واحد فيهم يقولك بحبك ويملى الفراغ العاطفى الى بتمرى به.
 
- عيب اوى تصاحبى تلاته علشان كل واحد فيهم يسمعك قصيدة شعر كل يوم فى قد ايه انتى جميلة ورقيقة وموزة وبكدة  ثقتك فى نفسك تزيد وتحسى بجمالك.
 
- عيب اوى تصاحبى تلاتة علشان كل ما تخرجى مع واحد فيهم تحرجيه فيضطر يشتريلك كل الى انتى محتاجاه وبكدة تكونى وفرتى فلوسك وفلوس اهلك.
عارفة عيب اوى ليه ؟؟؟
 
لان اكيد فى واحد من التلاتة دول قالك بحبك وهوفعلا حاسسها.. اكيد فى واحد منهم  كان لما يكلمك ويلاقى رقمك مقفول ولا مشغول وكان بيقلق عليكى ويبقى هيموت وتردى عليه علشان يسمع صوتك ويطمن انك بخير فى الوقت الى كنتى بتكلمى فيه غيره .. على فكرة برده اكيد فى حد فيهم ما يقدرش يتخيل حياته وانتى مش فيها ... تعرفى ده ممكن كمان يكون كان شايفك انتى ام اولاده ... وكمان اكيد اسودت الدنيا فى وشه وعيونه دمعت يوم ما عرف ان دبلة غيره بقت فى ايدك وان خلاص لازم يقطع علاقته بيكى و يعيش طول العمر من غيرك بعد ما كنتى كل حياته.
 
اقولك على حاجة كمان ممكن تبقى مش اخدة بالك منها ... انتى اكيد وجعتى قلب حد .. واكيد يوم من الايام هتشربى من نفس الكاس وقلبك هيتوجع اوى اوى
 
 *** كتبتها:  رنا احمد طالبة فى كلية الالسن جامعة  عين    شمس  من  بورسعيد  ناقدة  للواقع واحاول  دائما ان اعرض المشكلات التى  تواجه  بنات جيلى  وتسليط  الضوء  عليها  للفت  نظر  المجتمع  لها ومحاولة   حلها.