الجِيرة والعِشْرة
روزاليوسف اليومية
فى كل حى ولد عترة و صبية حنان
وكلنا جيرة وعشرة وأهل وخلاّن
أميرة عاقلة وفى الحجلة العقل يطِير
كانت صغيرة بضفيرة كان هو صَغِير
ساعة ما تضحك مع اخوها تلاقيه بيغِير
ولَمَّا ترفع قُلّتْهَا تلاقيه عطشان
زمانه ماشى بخطوة يضم
زمانها كبرت وبقت أم
زمان جواب جاى لها بيجرى على العنوان
فى كل حى ولد عترة وصبية حنان
وكلنا جيرة وعشرة وأهل وخلاّن
***
الفجر بيلاقى المغرب وبيجى ويِرُوُحْ
والليل يرُد على الشارع شباك مفتوح
هنا الرصيف وهنا السلِّم وهناك يا سطوح
متعلقة كمام النونو فى ديل الفستان
زمَانُه ماشى بخطوة يضم
زمانها كبرت وبقت أم
زمان ضناهم فى المدرسة كنز الأوطان
فى كل حى ولد عترة وصبية حنان
وكلنا جيرة وعشرة وأهل وخلاّن
***
نحضن ولادنا ولا نخلّى حنية وذوق
نفرح معاهم ونغنى لقدّام و لفوق
يادى العيون اللى بتقرا فى كتاب الشوق
الدنيا خضرا ومش فاضل على بكرة زمان
زمانه ماشى بخطوة يضم
زمانها كبرت و بقت أم
أصل الحكاية حكايتنا نبنى الإنسان
فى كل حى ولد عترة وصبية حنان
وكلنا جيرة وعشرة وأهل وخلاّن
