كاوبوى دينامو
روزاليوسف اليومية
كاوبوى دينامو
سايق غنمه
علَّق يافطه بعرض الريف
خلّى أَمِيرْكَا
تسْتَعْمرِكا
ست شريفه غرضها شريف
يوم ما بترمى عُقب سيجارة
تفتح بيه توريد وتجارة
شُق الحُصَلَة
اكسر بصلة
نخ وطاطى تبقى ظريف
كاوبوى دينامو
خليك جنى وَلَد جنيه
شيل من راسك الوطنية
نظف مخك أَلاّ تطخك
خَلّيه خالى من التخَاريف
كاوبوى دينامو
لها فى اللعب فنون وبراعة
فى مشاريع وبنوك وزراعة
تشتل
تشعتل
تفتل
تقتل
ست غنيه عن التعريف
كاوبوى دينامو
اطلع على مراكبها قلافطى
قولها خدى خلجاتى ونفطى
دى المحبوبة
جاتك غيبوبة
مدرسة حرة بالمصاريف
كاوبوى دينامو
حط دماغك تحت جناحها
ارضع فى البزازه مِنَحْهَا
بكره تبَيِّتْ
راقد ميّت
كيف الغاوى مع الحريف
كاوبوى دينامو