عُقْد الفُلّ والياسمين
روزاليوسف اليومية
تعالى نلضُم اسامينا
الفلة جنب الياسمينة
قنا سوهاج الاسماعيلية
بنت الصعايدة بحرية
الاقصر غزاله محَنّيَة
فى اسكندرية ترسّينا
وانا رشيدى ودمياطى
آخدك يا منصورة فى باطى
وأغنى وأرقص سنباطى
قبل القمر ما ينسينا
واعدّى ع الجيزه خَفَاجة
وردان ضلوعى الخفَّاجة
عيونى طلّت يا رفاقة
من وادى حَلْفَه على المينا
ع الضفتين ألقى ربوعى
وأعيد ميلادى وسبوعى
من كوم حمادة ينبوعى
فى جرجا ابريق الزينة
بلبيس ح نلبس دبلتها
شربين شربنا فى قلتها
بعد المحله ما حلتها
بنها العسل راح تشفينا
ودنشواى اسمها اصبح
اجلّ شاهد بيسبّح
فى المنزلة الضىّ بيرمح
وفى بحر يوسف سواقينا
والشاى يا واسطة فى السكة
نقعد يا منيا على الدكة
توصل بنى سويف الضحكة
نلاقى اسيوط وسطينا
عَصَرْت قلبى الجوَّاني
على التراب الأسوانى
رجع يا نوبة عنوانى
كوم اومبو رايقة وامينة
وطنطا شى الله يا سيّد
وطهطا نفْلَح ونشيّد
ونزور مغاغة ونعيّد
فى بورسعيد ع التراسينا
ومن السويس قلت يا لاللى
والقنطرة فجر تملّي
والوز الاخضر بيصلّى
على القناية من سينا
تعالى نلضم اسامينا
الفلة جنب الياسمينا
