إلى من يهمه الأمر خللى بالك يا برنس

كل سنة وانتوا طيبين.. امبارح كان رأس السنة الهجرية، عام جديد مر على المسلمين والمصريين، حصل فيه حاجات كتير واتبدلت فيه اشياء فى المجتمع، ابرزها إن الناس بدأت تفقد الاحساس بالزمن، وتفقد قيمة المناسبات.

الشهر ده عدى فيه مناسبتين كانت فى السنوات العادية بيكون ليهم شنة ورنة، وبتلاقى الناس بتحتفل بيهم بشكل ملحوظ، المناسبة الاولى هى عيد الحب، ودى اول سنة ميبقاش فى دباديب فى الشوارع واختفى الناس والشباب اللى بيبقوا ماشيين بشنط هداية لحبايبهم، لاحظنا ان الناس مبقتش مهتمية بانهم يحتفلوا بالحب لإحساسهم أنهم فى ورطة كبيرة مش عارفين يخرجوا منها.

المناسبة التانية هى رأس السنة الهجرية، فرغم ان الناس انتخبت الحكم الإسلامى عن عمد وقصد واضحين، فى انتخابات مجلس الشعب، وانتخابات الرياسة، وقبلها فى الاستفتاء اللى خرجوا وصوتوا عليه بنعم علشان الاسلام، رغم كل ده الا ان الناس مبتحتفلش برأس السنة الهجرية كما يجب، ودا بيأكد ان المجتمع حاسس بالخطر وان اللى جاى كله جد ومفهوش هزار، الى من يهمه الأمر، خللى بالك يا برنس.