عمرو أديب: «الدولار معرض للارتفاع والانخفاض لغاية مايحصل استقرار»

شدد الإعلامى عمرو أديب على أن كل التجارب المماثلة لتجربة مصر فى تعويم العملة حدث بها حالة من التذبذب فى العملة، مضيفًا: «الدولار هينط تانى وممكن يوصل لـ22 مش 16 بس، ولازم نتعود على عملية ارتفاع وانخفاض العملة لغاية أما يحصل استقرار».
وأشار اديب خلال برنامج «كل يوم»، على قناة «أون تى في» امس الاول: «إن شريف إسماعيل سيكون ضحية الإجراءات الاقتصادية وهيمشي، لأن دايمًا الوزارة اللى بتعمل الإصلاح مبتكملش وبتمشي»، مضيفًا: «بعد 20 سنة التاريخ هيتكلم عن الراجل ده».
وقال أديب، إن أى إصلاح اقتصادى يؤثر على الناس لمدة عام، مضيفا: «الناس هتفضل متبهدلة سنة بلاش تسكين لازم نقول للناس الحقيقة ونصارحهم ومحدش يقول للناس هننزل الأسعار محدش هيعرف ينزلها وأسعار المترو هتزيد ومحدش يضحك على الناس».
وأضاف: «حركة آسفين ياريس لازم تتحول وتبقى إحنا أسفين ياشعب لازم نطبطب على البشر، الناس اتضربت ضربة جامدة لازم نكون واضحين مع الناس»، متابعا: «التضخم هيزيد إلى نحو 23% فى ناس مفترية فى البلد وفى ناس بتلعب فى البلد وتهزر وتجرب فى الناس».
وتابع: «عمر ما هاشتاج نزل الدولار ولا حسن الاقتصاد، الاقتصاد بيتحسن بالإجراءات والإصلاح الاقتصادى يعنى أنت بترمى واحد من الدور العاشر بس بينزل على مرتبة حرير اللى هى العدالة الاجتماعية».