حكومة أفظع من إسرائيل

حادث قطار أسيوط اللى فرم تحت عجلاته 51 وردة من عيالنا، تناوله المصريين بشكل مختلف؟ يعنى احنا مش أول مرة نموت فى حوادث طرق أو مظاهرات، حصلت كتير، علشان كده احنا قمنا بثورة علشان نوقف نزيف الدم ده، وكل مرة بتحصل فيها حادثة بنصب لعناتنا على الحكومة لحد ما بوقنا يورم من كتر الكلام، لكن حادثة اسيوط خدت بعد تانى فى الشارع وبدأ الناس تعمل مقارنات جديدة مكانتش بتحصل قبل الثورة.
 
فمثلا بعد كل حادث قطار تلاقى الناس تفتكر حادث قطار الفيوم اللى اتفحم بالكامل هو وركابه، وتعقد مقارنات وتشبيهات بين هذا وذاك، لكن فى حادث قاطر اسيوط المصريين عملوا حاجة غريبة جدا ربطوا حادث القطار ده بضحايا مدرسة بحر البقر، اللى مات فيه 21 عيل من ولادنا بطيران الفانتوم الإسرائيلى، ده غير مقارنة المصريين عدد الشهداء اللى راحوا فى حادثة قطار منفلوط بعدد الشهداء فى غزة، وكانت جميع المقارنات بتقول ان اهمال الحكومة افظع من همجية اسرائيل ورعونتها فى استخدام السلاح الحربى!
 
المقارنات دى زادت من احتقان الناس فى الشارع، لانهم اكتشفوا أنه رغم سوء حكومة نظيف اللى اتسببت فى قيام الثورة الا انهم عمرهم ما ربطوا بين أى حادثة حصلت فى عهدها وبين ضحايا اتسببت فيها إسرائيل.
 
المنظور ده بيدل على ان الناس بقت على آخرها، وانهم بدأوا يفكروا بعدائية شديدة تجاه الحكومة، وان خيالهم بدا يروح لبعييييييييد.. ابعد مما تتخيل الحكومة واللى جايبها.