الخميس 28 مارس 2024
رئيس مجلس الإدارة
هبة صادق
رئيس التحرير
احمد باشا

أنتِ أميرة حتى لو من غير فارس أحلام




 عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن   فيها عن أنفسهن والحديث عن المشكلات والهموم والقضايا التى تشغل بالهن ويرفض المجتمع فى كثير من الأحيان الاستماع إليها. ويمكن التواصل والمشاركة فى هذا الباب عبر البريد  الإلكترونى:
 
 [email protected]
 
 
 
 
 
 
دائمًا أسمع وسط البنات جملة «الرجالة بتحب كده» كمبرر لتصرفاتهم الغريبة مثلا تلاقى بنت قلعت الحجاب.. بطلت تلبس واسع و اتجهت للبس الضيق والقصير .. من بعد ما كانت ما بتستخدمش الميك اب بقت بتستخدمه «بأفورة».. والعكس صحيح .
 
 ولما تسأل ليه ؟ ترد و تقولك اصل الرجالة عايزة و بتحب كده.. طب ايه علاقة الرجالة «بالاستايل بتاعك».. ترد و تقول ما انا عايزه «اعجب» علشان اتجوز...
 
أكيد كلنا شوفنا نماذج من البنات دى فى مختلف الطبقات الاجتماعية والتعلمية والمراحل العمرية وكأن المشكلة الى بتهدد صفو بنات المجتمع المصرى و الى شاغلة تفكيرهم طول الوقت هيه كيفية الحصول على زوج وكأن الحياه توقفت عندها ولو البنت ما اتجوزتش او تأخر سن جوازها هتموت:
 
اولا : لازم تبقى فاهمة ان مافيش حد يستاهل انك تعيشى علشانه غير نفسك.. مش مضطرة انك تغيرى فى فكرك وشخصيتك وشكلك علشان «تعجبى»... كونى انتى.. انتى الى مقتنعة بيها وحباها.. انتى الى عيشتى طول عمرك عليها .. انتى الى لما بتقفى قدام المراية بتنظريلها بفخر.. اوعى تغيرى فى مبادئك علشان حد.
 
ثانيا : انتى «برينسيس».. يعنى انتى الى تختارى وانتى الى تنقى .. يعنى يوم ما تحبى تغيرى فى استايلك يبقى علشانك انتى علشان، ربنا جميل يحب الجمال و خلقك انثى جميلة بتدور دائمًا انها تكون الاجمل .. مش علشان تعجبى نوعية معينة من الرجالة.. يعنى يوم ما تقربى من ربنا ميبقاش علشان الناس تشوفك وتقول عليكى انك عروسة متدينة وعارفة ربنا.. وفى الاخر برده يبقى علشان تعجبى الرجالة.. ما تتنازليش عن اى مبدأ من مبادئك .. انتى ما تعامليش نفسك على انك منتج بيطور من نفسه علشان يلفت نظر الزبون ويجى يستعرضك ويا يشيل يا ما يشيلش ... ربنا خلقك فى مكانة كبيرة وغالية اوى .. فما تجيش انتى و ترخصى نفسك.
 
ثالثا : لازم تبقى فاهمة ومقتنعة كويس ان الجواز شىء مهم .. بس «الاهم» تفهمى ان ده قسمة و نصيب .. عارفة يعنى ايه؟ يعنى مكتوب فى وقت معين بطريقة معينة بصدفة معينة لو وقفتى على راسك لا هتغيرى ميعادها ولا هتقدميه او تأخريه.. عارفة يعنى ايه كمان.. يعنى جاى دلوقتى ولا بعدين جاى جاى لانه قدر .. و لو قدرك انك تعيشى فى الدنيا «سينجل» «مش» هتتجوزى ولو عملتى البدع ... بس تعرفى انتى لو ما اتجوزتيش فى الدنيا ايه الى هيحصل؟ .. يوم القيامة هتقفى قدام ربنا و يخيرك تجوزى من شباب أهل الجنة ... شوفتى بقى انك فى الحالتين كسبانة ومش هتخسرى حاجة ... شوفتى بقى ان مش عليكى عبء كبير اوى كدة زى ما انتى متخيلة.
 
عيشى حياتك بالطول و العرض و استمتعى بكل لحظة فيها و كل مرحلة عمرية ما تخليش حاجة واحدة هى غرضك من الحياة .. الحياه فيها متع كتير وأهداف أكثر ممكن تعيشى علشانها غير الجواز او لحد ما يجى الجواز .. فكرى فى مستقبلك.. عيشى علشان نفسك .. ما تفكريش فى كلام الناس او نظرتهم ليكى حطى ديما كلام الناس ورا ظهرك.. لانه مش مهم.. فما تشغليش نفسك بحاجة مش مهمة
 
 
 
 
* رنا أمين .. طالبة بالفرقة الرابعة بكلية الألسن جامعة عين شمس تحب تعلم اللغات، وتعيش فى مدينة بورسعيد..

تحب نقد الواقع والتعبير عن مشاكل بنات جيلها وترى أن هناك من البنات تجعل الزواج هو شاغلها الشاغل فى الحياة وبدونه تتحول حياتهن إلى كابوس ولكن ترى رنا أن يجب أن لا تتعجل الفتاة فى الارتباط من أجل أن تنال لقب متزوجة فقط وتعيه فى حياة تعيسة وترى أن الفتاة عليها التأنى والتمهل فى الاختيار وسيرزقها الله بمن يستحقها.