واحة الإبداع.. عصافير الجنـه

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى:    
[email protected]

اللوحات بريشة الفنان عماد إبراهيم



عصافير الجنـه


كتب: على أبوسراج

عصافير الجنّــه الرجاله
إمبارح .. كســروا الحصّـاله
علشان الغاليـه ام الدنيــا
ما تمدّش إيدها تكون عاله
تصقيفه لعصافير الجنه
والإيد الصّـاحيه الشّـغاله
كف العصافير.. كتّـر خيـره
صبّــح بجنيه ومسّـى بغيره
قطر اكسبريس عارف سيره
وعارفها كبيره و حمّــاله
تصقيفه لعصافير الجنه
والإيد الصّـاحيه الشّـغاله
الفرحه يا ناس مش سايعانى
والدنيا اهى شايفه و سامعانى
وكتبت الغنوه دى بالعانى
وقلوبكم مش عايزه قواله
تصقيفه لعصافير الجنه
والإيد الصّـاحيه الشّـغاله
الشمس بتطرح .. مزيــكا
والحزن مســحته بأستيكه
مصرنا أحسن من أمريكا
وقلوبنا لعشقها مياله
تصقيفه لعصافير الجنه
والإيد الصّـاحيه الشّـغاله
الشّاشه بتكدب.. غشّــاشه
دا العتمه بتمشى وتتلاشى
والدنيا.. ميت فل «بغاشه»
والناس «اياهم» هوّاله
تصقيفه لعصافير الجنه
والإيد الصّـاحيه الشّـغاله
عصافير الجنه الرجاله
إمبارح.. كسروا الحصاله