الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

الزمن الصعب

الزمن الصعب
الزمن الصعب




ماجد غراب  يكتب:

نفسى اعرف ايه الجريمة اللى عملها محمد صلاح عشان يتهاجم من البعض بالشكل دا؟
وفجأة لقيت نفس البعض بيحملوا صلاح كل همومنا ومشاكلنا اللى هو قطعا مش مسئول عنها! الموضوع ببساطة ان صلاح مع رئيس مصر ووزير مصر، اتبرع عشان تحيا مصر.
ايه بقى الجريمة اللى ارتكبها عشان نلاقى كل الجدل دا؟ احنا بقينا فى زمن صعب، حتى الحاجات الحلوة اللى بقت قليلة دلوقتى بنشكك فيها ومش عارفين نفرح بيها.
عارف ان الدنيا دلوقتى بقت صعبة، وصعبة اوى كمان على ناس كتير من اهلنا لدرجة مش ممكن يتخيلها حد، لكن هو دا الوقت اللى كلنا فيه لازم نقف جنب بعض ومع بعض، وكل واحد منا يساعد باللى يقدر عليه من غير ما حد يطلب منه.
احنا فى مرحلة صعبة معندناش فيها رفاهية الوقت وملناش حل غير اننا نعديها ـ وان شاء الله هنعديها ـ لأننا دلوقتى على الطريق الصح، أيوه الطريق الصح، لأننا لأول مرة بنواجه مشاكلنا، وطول عمرنا كدولة كنا عايشين على النوتة والدعم، والمرة الوحيدة اللى جه فيها الرئيس السادات من زمان يرفع الدعم قامت الدنيا عليه ومقعدتش لغاية ما تراجع عن قراره، ومن يومها وازماتنا بيتأجل حلها لغاية اما يجى اللى يحلها ومن الاخر يشيل الشيلة.
وجه الوقت اننا نبدأ نغير فيه تفكيرنا ونشتغل ونبطل نعتمد على بعض الدول «اللى فى فترة ما» بتنسى معانى الاخوة والعروبة وبتفتكر انها ممكن تملك ارادتنا بشوية فلوس وبترول.
والله عارف ان كل حاجة بقت اسعارها ناااااار، وعارف كمان ان فى مرضى وفقراء ومحتاجين مش لقيين لقمة العيش ولا العلاج ولا عندهم ابسط معانى الحياة، وعارف كمان ان جيلنا دا واجيال تانية بتدفع التمن غالى من احلامها وطموحاتها، وعارف كمان وكمان ان فى ناس تانية مرفهة وربنا كرمها ومش حاسه بالظروف الصعبة اللى كتيررررر منا عايشها، لكن عارف كمان ان فى كتيررررر منهم بيساعد المحتاج فى الخفاء والعلن، وعارف كمان ان كتيررررر منهم لازم يقف مع بلده اكتر من كده فى الوقت الصعب دا، ولاننا فى الاخر ملناش غير بعض وبنعيش مع بعض، لازم نحب ونتمنى الخير لبعض عشان ربنا عز وجل يجازينا بالمثل وعشان كمان بكره يبقى افضل.
وان شاء الله هيكون افضل، طول ما عندنا يقين بالله عز وجل، وطول ما احنا ايد واحدة، وشعب واحد، بنفرح لبعض وبنخاف على بعض فى الزمن الصعب ده، واللى مهما طال وقته مش هيفضل صعب للنهاية.
واكيد هيجى اليوم اللى كلنا بنستناه وبنحلم بيه مهما اتأخر الوقت، فقط نثق فى قدرة وعظمة الله عز وجل، وان القادم لهذا الوطن افضل بإذن الله.