الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

واحة الإبداع.. يوم وأخوه

واحة الإبداع.. يوم وأخوه
واحة الإبداع.. يوم وأخوه




يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى:    
[email protected]

اللوحات للفنانة نرمين بهاء الدين



يوم وأخوه

للشاعر - حسام عبد الحى

يمكن تلخيص الوضع الحالى..
بما هو تالى:
صوت صريخ..
ناس ف طرقة رايحة جاية..
صوت عياط..
ضحكة فاترة ف وجه أم
بعض كلمة من هزار..
ثم ضم..
ثم افراغ العواطف كلها من عينها ليك.
عودة للبيت اللى ناوي..
تبتدى حكايتك ف قلبه..و يبتديك.
يوم وأخوه..
أول الخطوات بتشجيع الجميع..
يوم وأخوه..
الكلام يبقاله معنى والحروف كفت تضيع.
اول الأيام ف حوش المدرسة
و اكتشافك  قدرتك ع التريقة والمألسة.
نقل خبرات مش ظريفة ونهر أمك والعتاب
نظرة الأب اللى هي..
نوع مشدد م العقاب
يوم وأخوه..
الشهادة وفيها كحكة واقفة متنية بسذاجة
يوم وأخوه..
اهتمامك صار مشتت..
صار لرأيك بعض حاجة
صوت بيتخن..
أول اختبارات تخانته
كان ف وش الأم..طبعا
انكفائك ع الكتاب..
حلم وردى بانتهاء سنوات عذاب.
جامعة..فرحة .. اصحاب .. بنات
حب يتجدد يوماتي..
سهد كاذب بالساعات
كل نظرة وليها قصة..
أصلها بس ف خيالك..
أول الأخبار بموت..حد غالى فجأة..جالك..
يوم وأخوه..
تنتهى سنوات جميلة..
يوم وأخوه..
السهر بقى كل ليلة..
تدمن القهوة اللى كانت..
شأن بس كبار عيلتكم..
البيوت بقى ليها هيئة..
غير ما تذكر عن حارتكم
الشعور بالمسؤلية تجاه معيشتك
كلمة المصروف بتصبح كلمة عار
و تبقى عيشتك..
شغل شغل شغل شغل ليل نهار
ساقية بايخة متنتهيش
ثم فجاة بنت حلوة
لجلها..ترجع تعيش
اكتشافك موهبة أشعار دفينة..
ايد موازية ع المجادف تعدل الميل ف السفينة..
ضحكة منها وضحكة منك..
رأى ابوها انك انت شخص ساذج..
اما هى بدون مجادلة واحدة خايبة ف رأى أمك..
عيشة تانية..
بيت جديد..
شغل شغل شغل شغل..مزيد مزيد..
صوت صريخ..
ناس ف طرقة رايحة جاية..
صوت عياط..
عيلة زادت فرد تاني..
و فرد مات
فراق فراق..
كل تجعيدة ف ملامحك..ليها قصة وذكريات
يوم وأخوه..
الحكاية بتفصيلاتها تشوفها كاملة بدون رتوش
يوم وأخوه..
تدرك الاحساس بلهفة كنت يومها محستوش
يوم ما هتجوز ولادك تدرك ان العمر فات
ضحكة بتدارى المقاوحة وازدحام كافة حاجات
ريتم أيامك بيصبح
غير ماكان موصوف ف وصفك
تكفى اوقاتك ساعتها
لفضفضة نفسك لنفسك
tمما كنت حسبته ليها..
وأن أحسن حاجة فيها
لحظة لم تندم عليها
ضحكة كافية ف قعدة صافية..
سجدة طالت.. دمعة شافية..
طبطبتها عليك ف ضيقتك..
قهوة معمولة عمولة
تريقة بنتك ف شيبتك..
خطوة أولى..
نظرة أولى..
دمعة أولى.. ضحكة أولى
ثم تيجى ف لحظة نادرة..
من تباديل الزمان..
تبقى راضى عن اللى كان..
بصة للعالم بأسره مجتمع ف يومين تلاتة..
وابتسامة بجنب مايل..
تخفى م الخبرات..مئات.
صوت صريخ..
ناس ف طرقة رايحة جاية..
صوت عياط
صوت سؤال واحد معدي..
هل ده مولد.. أم ممات..
ثم شاعر..
سولت له نفسه يوصف من سكات..
زى ما الأيام هتجرى..
بينا برضه..من سكات!