السوشيال ميديا: الناس دى زينا والله يا جماعة عادى.. شعرها هايش وسمارها مش بيلمع.. حبوا نفسكم

تداول رواد مواقع التواصل الاجتماعى صورة للفنانة «ياسمين صبرى»، وهى بدون ماكياج وصورة لها بنفس الفستان وهى متألقة وبتلمع على حد قولهم، وانقسمت آراء الجمهور حول الصورة فيما إذا كانت ياسمين خضعت لعمليات تجميل أم لا؟! حيث أكد محبو ياسمين أن نجمتهم «جميلة» ولم تخضع من الأساس لأى عملية، وأن الملامح التى تبدو متغيرة قليلًا ذلك بسبب فرق العمر.
فيما علّق البعض بأن ياسمين خضعت لعمليات على الأقل لحقن «فيلر» و«بوتوكس» وهذا ما يظهر جليَا فى منطقتى الشفاة والوجنتين، حيث أصبحا أكثر امتلاءً من قبل.
إذ قال أحد النشطاء عبر حسابه الشخصى على فيس بوك: «الشعب المصرى الوحيد اللى ممكن يقلل من نفسه لدرجة إنه شاف واحدة ملونة وشها ولا كاوية شعرها.. الشعب المصرى الوحيد اللى ممكن يريل على بنت حلوة كلها ميك اب وقرف.. ياريت فعلًا الشعب يهتم بنفسه ويفكر فى البنت نفسها ميفكرش فى جمالها ولا فى لبسها ياما الجمال واللبس بيدارى عيوب ممكن تخلى حياتك جحيم فوقوا يرحمكم الله».
وقالت أخرى عبر حسابها على فيس بوك: «على فكرة كل المشاهير بيعملوا ميك أب ويلبسوا اغلى براند لكن حقيقى ياسمين حلوة وجمالها هادى وجذابة أوى بس صورة مش كانت عملت ماكياج ولا شعر وكمان الكاميرا مش حلوة وبعدين أجمل حد فى الكون عنده صور وحشة طبعا احنا لازم نحب نفسنا بس مش تقول انها مش حلوة».
وقال آخر: «أنا بالصدفة شوفت الصورة اللى على اليمين دى من يومين بنفس الفستان.. الناس دى زينا والله ياجماعة عادى وشها بيلمع.. شعرها هايش.. سمارها عادى مش منور ورائع وع فكرة دى مش عيوب فيها ده «الطبيعى» لكن الصورة الـ perfect دى هى الى مش طبيعية!! حبو نفسكو مفيش مانع نحاول نبقى أحسن ونهتم بنفسنا بس بلاش نتعقد من نفسنا».
وجاء نشر صورة ياسمين بعد ترشيحها ضمن أجمل 100 وجه فى العالم لعام 2017، من قبل موقع TC Candler.