واحة الإبداع.. ضريح الشوق

 

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى:    [email protected]

اللوحات للفنان وجيه يسى


ضريح الشوق


شعر - تيام الشافعي


وباسم الحزن اللى كان سايل سنين ع الخد
وباسم النار اللى كات لابده فـ جدار الحلق
أنا هانزع
حروف عشقك
بداخل كل لحظة شوق  
وهاقتل
فى الوجع دمعة
بتتسرسب  
واضُـخ الكون
بـوِرد جديد
بيتهجّى صدى الأنوار
فى عز ماكانت الدنيا
فـى حلق الظلم تستطعم سلاح الغدر..
وكان القهر بيكتــّـف
جراحى ومهجتى بالدم   
وفـرّع
فى الجسد مـ الهم
ومـرّر كل أنفاسى..
ولسا الجرح
بيصُـب فـ وريد النوح
ومش قادر
يطول نظرة من الرحمة
ومتكتف بذل الغلب والمحنة..
وانا عينى
نزيفها جف وابيضت
ومش لاقى شروق فيها
وخانـّى الديب
وبيفـرّق
بواقى من مآسيها..
وبيجــرّح
خيوط الصدق من توبى
وبيلطـَّـخ
 قميصى بدم من شوقي
وانا قهرى
زرَع كل السجون صبار
وكل نهــار
يجينى يصلى ويسبّح
ويستنى
بواقى الصبح فى الملكوت..
وبترجاك يا اخناتون
بحق السجن والأوجاع..
وطيف الوحى
والصفـّـة على الأتباع
وحق الطفل فى المهد اتوهب لله
لإمتى السحر هايفكـّـك عضام الضى؟!
وإمتى الحق هايفـتــّــت حيطان الزيف
وكل رغيف
هايتوضا بنور القمح..
يا إخناتون
كبير الكهنة بينازع  
وبيسلـَّـم  جراحى لـ أخلص العـبّـاد
ولساه الشرف محْـنِـى
على الأعتاب
على اكتافه جبال اليتم
وفى ضلوعه
بحور القهر والحرمان
وفى جيوبه
سنابل خضرا منسيّـه..
 قوليلى ازاى
 يشوفك جرحى قدامه ومايدمّعش  
واخـبّى محنتى بإيدى
واخلى بكاها من غير صوت
دنا بنطق
حروف عشقك فى عز النوم..
قوليلى ازاى
أتوه منك
وانا فيكى وَتـَــر تسابيـح
واخبى إزاى
نيران سهدى
وعشقك ريحته فى التباريح..
خلاص
أخدت عزاها فى السماوات
ومتكفـّـن هواها هناك بتوب القهر
وحتى الشمس كات مصلوبة
وبتنزف بواقى المهر
وبتعزّى
بواقى عشقها المدبـوح..
خلاص إسمك
بقا ذكرى
فـيآيات الـنِـدا والنوح
وصورتك
فى الخلا بتسرى فى شريانى..
هنا عاشق
بيسقى الزرع
بفرع النيل فى أنفاسه
هنا بتكتب بدم الغلب أنـّـاتـه      
جريح الحق
بيعزّى فـ ضريح الشوق
جريح الحق بيعزّى
ضريح الشوق...