واحة الإبداع.. حنة الأيتام

اللوحات للفنانة
جيهان سليمان

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى: 

[email protected]


حنة الأيتام

شعر:‏ على أبوسراج


قلبى يارب اتكسر
والحزن عشش.. فيه
يارب.. لاجل النبى
شايف البلد.. وايش فيه
إحمينا م الخاينين
وارضى المصاب.. واشفيه
ولدى اللى أعلم بيه
فى الحق.. سيف بتّــار
يعرف يجيب التار
ويفوت فى قلب النار
ويخلى ليلنا نهار
كل اللى عرفه و شافه
عشقه.. وصاحبه.. وخافه
شايل هموم الوطن
غنوة على كتافه
يا واسع المغفرة
يا كريم.. يارب العباد
إقتص م اللى افترى
ما تسوّناش فى الواد
و يا مصر.. يا مدهشه..
خصمك.. ماعندوش خٍشَا
عارفه اللى سابنا و مشى..
دا عريس بفرحه انتشى..
لا يجوز عليه البكا..
ولا نحيب و عديد
أدّى الرسالة و كان..
بركان على الخوّان..
غنيوته لاجل الوطن..
ماتخشهاش أحزان..
كفه.. سبايك دهب..
ترمى الرصاص و اللهب
على أى مجرم كان..
خلّى ضلوعه دروع..
تحمى العجوز و الوليد..
قايد صوابعه شموع..
و مخلّى خصمك.. « وقيــد»..
ف انسى الرعاع الحثاله..
إبنك ـ صلاة النبى ـ
أدى الرساله ببساله
كلمته مره الشهيد ..
قلت لّه .. قلبى معاك ..
إوعى لعدوك هنا ..
واوعى لعدوك .. هناك ..
قلبى اللى شايف الخطر ..
ولول عليك .. وانفطر ..
بس انت مارد .. بطل ..
عارف لقيمة الوطن ..
و عرفت فين .. داءك ..
صبّـيت جحيمك .. مطر ..
على وش أعداءك ..
تسلم يازين ما احلاك ..
خليك تملّـى كدا ..
يا زينة الفرسان
صهد و نيران ع العدا ..
و ميّـه للعطشان ..
إشهر سلاحك ع العدا الخاينين
واكتب بدمك .. دول ..«ختامهم طين»
وانت يا ست البلاد ..
عارفاه .. و عارفانا ..
كان قلبه طيب .. حسيس
بس .. الجبان الخسيس ..
واخده على خوانه
نلت الشهاده ..يا بختك ..
ربك بقى و حكمته
فارد قلوعك .. و يختك ..
طاير على جنته
لسه الكلام .. موصول
نام يا عريس الحور ..
عزم الرجال .. مفتول
بيعدى بينا بحور ..
كل اللى زيك .. خليل
ما انت الامام و الدليل
يا ابوالدما .. سلسبيل
بيبل .. ريق الأرض ..
يا ابن الهرم .. و النيل ..
عشقك علينا .. فَرضْ
فضفض وقول واشرَح ..
واشرِح قلوبنا اشرِح ..
يا نعمة الأيام ..
يا حنـة الأيتـام ..
أبقى تعالى ف منام..
 واحكى لنا.. قول بالتمام..
طعم الشهادة إيه؟..
يا حليوه فى الجنة..
ورّيـنا.. شايف إيه؟..
وازاى بتتهنى؟
أنا زرت بيتك سعيد..
كنّـه ميدان مفتوح
زغاريد.. وفرح و عيد
لا ولوله.. ولا نوح
دا الكون.. سجد لله
لحظة طلوع الروح
والبيت.. و طوب الأرض..
بيحضّـروا الزفة
وعيالك البساتين..
ما حد قال منهم ..
الفارس اتوفّى ..
شايفين ملايكه و جِنــان..
و المسك.. فايح.. فوح
يا ابو البيريه و البيادة..
إنت اللى صاحب السعادة..
من دمّـك المستباح..
هالل علينا الصباح..
دمّـك.. مدد للوطن..
شربات و بلّـينه
عٌقْد الفرح.. موصول
فدو الوطن.. عاده
مبروك علينا الشفاعه..
مبروك عليك الشهادة..