face 2 face
روزاليوسف اليومية
عبدالرحمن : شغال فى غير مجال دراستى ..
والحياة فى مصر صعبة.. بس مش هسيب البلد!
عبدالرحمن ورشاد شباب من أرض البلد دى، ليهم احلام وطموحات واجهتهم مصاعب ومتاعب كتير لكنهم ميأسوش وان كان طريقة التعامل مع العوائق مختلفة، قدروا يحققوا قدر من طموحاتهم بالاجتهاد، وده اللى هيبان فى المواجهة دى.
واجهتهم - مروة مظلوم
■ عرفنا بنفسك ؟
ـ عبدالرحمن حافظ 23 سنة كلية تجارة جامعة الإسكندرية، شغال حاليا مصمم جرافيك، وهى شغلانة مالهاش علاقة بمجال دراستى، فأنا من البداية كنت عايز أدخل فنون جميلة ومجموع الثانوية العامة ماساعدنيش على تحقيق حلمى، فقررت أمارس الشىء اللى بحبه ودخلت كلية تجارة وبعد ما اخدت البكالوريوس أخدت دبلومة جرافيك.
■ ايه المشاكل اللى بتقابلها فى الحياة؟
ـ أول مشكلة انى لما فتحت مكتب للدعاية والإعلان اكتشفت ان العملاء ميعرفوش معنى الدعاية والإعلان!، ولاحظت ان مفهوم الدعاية والإعلان فى السوق المصرى بيتراوح ما بين 10% إلى 50% من المفهوم الصحيح، وفى أصحاب أعمال الدعايا والإعلان بالنسبى لهم عبارة عن يافطة بتتحط على الباب فيها اسمه، وده كشف لى اننا فى مصر مفتقدين للحس التسويقى الدعائى وانه مش واصل لكتير من رجال الأعمال اضافة إلى ان الناس اللى عندها فهم للدعاية والاعلان قليل منهم اللى بيهتم بجودة التصميم.
■ فكرت تسافر بره مصر؟
ـ فى أوقات كانت الدنيا صعبة جداً فى شغلى لكن انا مش حابب اسيب مصر لو الإنسان ما ثبتش نفسه فى بلده مش هيعرف يثبتها برة ومتأكد ان قريب جدا ان شاء الله وضع مصر هيتصلح والمتميز هيلاقى نتيجه تعبه.
■ بحساباتك شايف انك ممكن تفتح بيت وتكون أسرة بعد كام سنة؟
ـ دى كانت حسبتى بعد التخرج هو الإنسان قبل ما يدخل فى جو السوق بيبقى حساباته وردية نوعا ما لكن الحمد لله حساباتى ما اتغيرتش كتير من 3 لـ 4 سنين ان شاء الله رغم انى متأكد ان الموضوع مش بالسهولة المتوقعة.
رشاد: مصر تعبتنى.. وسافرت لما عجزت إنى أعيش بـ300 جنيه.. وبحلم ارجعلها
■ عرفنا بنفسك ؟
ـ اسمى رشاد الغاياتى 27 سنة معايا بكالوريوس تجارة دفعة 2006 بعدها حصلت على دبلوم دراسات عليا فى المحاسبة المالية دفعة 2009، وشغال دلوقتى محاسب فى شركة بالسعودية.
■ ايه المشاكل اللى بتقابلها فى الحياة؟
- انا كان حلمى بدأ من قبل ما اخلص دراسة وأصريت أحققه تحت أى ظروف اتخرجت بتقدير مقبول ولكنى دعمت نفسى بكورسات وشهادات واشتغلت حاجات كتير بدأت بمرتب 300 جنيه كمندوب مبيعات وتسويق فى شركة فى مصر، مجال غير مجالى خالص ولازم علشان اشتغل فيه اكون تيكنكال اشتغلت فى 3 شركات خلال سنتين.
■ فكرت تسافر بره مصر؟
ـ حصل.. لما لاقيت ان الـ 300 جنيه مرتب مش هايعيشونى، كان عندى أمل انى افضل فى مصر برغم فرص السفر الكتير، حاولت لفترة انى اتمسك بالبقاء فى البلد لكن لفترة لاقيت أحلامى بتنهار وكان انى لازم آخد قرار السفر وفعلا سافرت على أمل أنى أقدر أرجع لما احقق حلمى ويبقى لى مشروع خاص اديره بنفسى.
■ بحساباتك ممكن تفتح بيت وتكون أسرة بعد كام سنة؟
بعد ما سافرت بسنتين الحالة بقت كويسة وبقى عندى المقدرة إنى اقدر افتح بيت واعمل أسرة، ودى الحاجات اللى كنت أتمنى إنى احققها وأنا قاعد فى بلدى.
