نشطاء مواقع التواصل لوزير التخطيط: هو ثورتنا قامت عشان 2 جنيه؟
مروة فتحي
تصريحات الدكتور أشرف العربي، وزير التخطيط والتعاون الدولى، بأن المواطن يكفيه 8 جنيهات يوميا من أجل معيشته، أثارت غضب نشطاء مواقع التواصل الاجتماعى «فيس بوك» وتويتر حيث وجهوا للوزير العديد من الأسئلة منها «ممكن نجرب مع سعادتك شهر واحد تعيش فيه بـ«8» جنيه فى اليوم؟؟
سندوتش الفول بجنيه ونص، ولو بنى أدم فطر واتغدى واتعشى بسندوتشين فول يعنى 9 جنيه فى اليوم»، وقال آخر «يعنى الثورة قامت عشان 2 جنيه؟» فى إشارة إلى تصريحات عثمان وزير التخطيط فى عهد الرئيس المخلوع حسنى مبارك، والذى أكد وقتها أن المواطن يستطيع أن يعيش بـ6 جنيهات فى اليوم، وهنا وأخيرا ظهرت نتائج الثورة على المواطن المصرى».
فيما عبر آخرون عن استيائهم من تصريحات الوزير الصادمة قائلين: «هو أنت جربت دا على نفسك قبل ما تتكلم عنه ولا بتقول كده وخلاص.. حرام عليك.. يعنى هنفطر ونتغدى ونتعشى بكام؟ ومصاريف الأولاد كام؟، والمواصلات نعمل فيها إيه؟ ارحمونا بقا كفاية»، فيما قال ثانى «يا ريت تدى سيادة الوزير مبلغ 8 جنيهات يوميا ونشوف - وهو بتاع التخطيط - هيعمل فيهم ايه على رأى عادل إمام ممكن يجيبوا «.....» أيوه ذى ما حضرتكم بتقولوا كده»، و«طب واللى عاوز يحوش عشان يتجوز يصرف كام ويحوش كام لو صرف 5 جنيه وحوش 3 جنيه كده يبقى هيتجوز بعد 120 سنة على الأقل.. الحياة حلوة وبسيطة مع حكومتنا».
وجاءت بعض تعليقات النشطاء لتحمل السخرية من تصريحات الوزير التى لا تتفق مع الواقع الحالى من تراجع قيمة الجنيه المصرى أمام الدولار كالآتى: «طب وليه الإسراف ده؟، كدا كتير يا راجل»، و«مين قال عاوز ثورة.. ثورة يا بيه.. ثورة يا هانم.. الثورة بـ2 جنيه ثورتنا قامت علشان 2 جنيه فقط لا غير حد لسه ناقصه 2 جنيه كمان»، و«شقتين فول وطعمية للفرد الصبح، شقتين بطاطس وبيض للغدا.. وشقتين جبنة وحلاوة فى العشا.. بس وزير التخطيط نسى أن سندوتش الفول بقى بجنيه»، باشا باشا ندفعلك 8 جنيه فى اليوم وتصرف علينا»،
