السوشيال ميديا: منتقدو «حرب كرموز» عندهم عقدة الخواجة.. وهوليوود مليانة غلطات

 كتب – أحمد عبدالعليم


حالة من الجدل شهدتها مواقع التواصل الاجتماعى عقب صدور إعلان فيلم «حرب كرموز»، وطارد سيل الانتقادات الفيلم الذى يضم نجم الأكشن العالمى سكوت آدكينز، حتى قبل طرحه فى دور السينما.
«روزاليوسف» رصدت بعض آراء الشباب ما بين مؤيد ومعارض على «فيس بوك»، وسخر شاب من الإعلان مدوناً: كرارة بيقول محدش هيموت النهاردة.. بس احتمال كلنا نموت إزاى مش عارف، بينما رد آخرون على لقطة الانفجار التى قفز فيها الممثل الإنجليزى بينما لم يتحرك خلفه الممثلون المساعدون: دول مصريين يعنى بياكلوا فول ميتأثروش بالقنابل والكلام ده.. بويكا يطير ماشى عيل نايتى أما إحنا على وضعنا.. أو يمكن الرجالة دى شاربة سمن بلدى وبويكا شارب براندى فمهزوز.. وتساءل أحدهم: «هما إزاى صناع الفيلم مبياخدوش بالهم وبيعدى عليهم حاجات زى دى وناس كتير عادية بتلاحظها»، وأبدى آخر تعجبه: الفيلم مصروف عليه كويس ومستخسرين يجيبوا حتتين سلاح حقيقيين.. البنادق والسلاح الخشب معمولين عند أنهى النجار؟
بينما هاجم شاب المنتقدين قائلاً: فذلكة وعقدة خواجة، لأن فى مشاهد كتير فى الأفلام الأجنبية بيكون فيها سقطات واضحة بشدة ورغم كده بتعدى على العيون مرور الكرام، وأيده آخر: ده تطبيق عملى للمثال بتاع ملقوش فى الورد عيب قالوا احمر الخدين.. وكتب أحدهم: إحنا لسه بنحسس الطريق لحاجة نظيفة ودى بداية جيدة جدا.. شوف troy اللى ظهرت فيه طيارة.. أو كابتن جاك سبارو وهو لابس أديداس.. لو دورت على غلطات الأفلام العالمية مش هتلاحق.. مفيش فيلم اسمه لقطة لقطة فى فيلم اسمه فى مجمله ممتاز أو فى مجمله «ضعيف».