الرجالة من المريخ...اه والله

عالم البنات مليء بالأسرار ولا يعرف تفاصيله سواهن لذا قررنا منح هذه المساحة للبنات ليعبرن   فيها عن أنفسهن والحديث عن المشكلات والهموم والقضايا التى تشغل بالهن ويرفض المجتمع  فى  كثير  من  الأحيان  الاستماع  إليها. ويمكن التواصل والمشاركة فى هذا الباب عبر البريد  الإلكترونى:

 [email protected]


 الرجال من المريخ والنساء من الزهرة

 بيقولك فى راجل كوبرة اسمه جون جراى دكتور نفسانى ومعالج أزواج- Couple Therapist بمعنى لما اتنين متجوزين يحصل بينهم مشاكل ويشدوا ف شعر بعض.. يروحوا لحلال العقد.. يحل مشاكلهم وبعد نجاحه الكاسح ف الجلسات العلاجية والمؤتمرات، نشر كتابه Men are from Mars Women are from Venus


فكرة الكتاب بتقوم على إن الرجالة من كاوكاو والستات من كاوكاو تانى
ايه بقى هى الاختلافات اللى بين المريخ والزهرة؟ بين الرجالة والستات؟
بيقولك ايه بقى عمنا جون؟

بيقولك إن الراجل عامل زى الاستك

يعنى خلال العلاقات الزوجية بيجى ع الرجل وقت بيبقى عايز يروح فيه الكهف بتاعه لوحده عشان يفكر أو يرتاح منك

ففى تلك الأثناء لما جوزك يا حبيبتى ياكل سد الحنك اكتمى انتى كمان وقولى هوووووووووب عشان الدمعة ما تفرش من عينك

سيبيه... ما تلزقليوش... راح البلكونة هو حر ولا تتحججى وتقولى هاعمله كوبايه شاي
ولو نزل وهو مخنوق من البيت.. سيبيه ولا تبعتيله رسايل انت فين يا حبيبي
ولا تقوليله: معلش النوبة دى عشان خاطرى يا ست شادية
هى الرجالة كده يا أوختشي

لوحايلتيه هينفش ريشه ويسوق فيها ويفضل كتير ف الكهف وانتى تتنقطى يا حبيبتي
فالحل الوحيد: فكككككك منه

وهو هيرجعلك مهو ملوش غيرك بس هيرجع لوحده انتى ماتجريش وراه
أصله زى الاستك بيشد ويجيب آخره ويرجعلك

وقتها روحى اعملى حاجة تخليكى هابى زى ما جون بيقول
اقرى كتاب استمعى إلى بعض الموسيقى

اشتغلى شوية ف الحديقة... وطبعاً احنا معندناش حديقة إلا إذاااا.. إلا إذا كنا من أولاد الذوات وساعتها برضه هيبقى عندك جناينى ومش هينفع تتجوزى ابنه يا انجي... فروحى اعملى المواعين ولا اعمليلك تشيز كيك ولا حضرى لنفسك كوباية كاكاو سخن عشان تهدى أعصابك
اعملى تمارين أو امسحى الشقة مثلاً ما عدا الاوضة اللى هو قاعد فيها

مساج، وده مين اللى هيعملهولى ان شاء الله؟ اللى مابيعملهوليش واحنا متصالحين هيعملهولى دلوقتي؟ وده طبعاً هيكون ردك الطبيعى عزيزتى القارئة ع التخريف اللى أنا باقوله مصحوباً برفع حاجب وضم الشفتين مثل الأرنب وتحريكهم يميناً وشمالاً كأنك بتقوليلى يا حسرة عليا.. أحب أفكرك حبيبتى القارئة إن ده ف أمريكا والدول المتقدمة.. فكى عقدة بؤك وحواجبك بقى اللى يرضى عليكي

اعزمى نفسك على حاجة لذيذة وشهية... كيس شيبسى عائلى أو أيس كريم شوكولاتة
كلمى واحدة صاحبتك واعدى لوك لوك للصبح

اكتبى مذكراتك.. وطبعاً ده ف أوروبا والدول المتقدمة بس لأن ف الدول النامية أو حتى اللى لسه عاملة ثورة قريب...أى حد ممكن يقراها ويسيحلك فبلاش فضايح

صلى أيوة صلى هو جون اللى بيقول مستغربة كده ليه؟ اكمنها جاتلك من الغريب؟ معلش يا حبيبتى ما غريب إلا الشيطان... أو تأملى ف الكون أو الخلق اللى ماشية ف الشارع من البلكونة أو حتى الشباك.. يجوز برضه

اعملى شوبينج وكل جنيه تصرفيه... همك هينزاح يا حبيبتى وهترسمى البسمة على وشك
انزلى اتمشى وفكى عن نفسك شوية

خدى حمام فقاقيع... بالشامبووووو و الشاور جل واملى البانيو واغرقي.. قصدى واستمتعى بحمامك

اتفرجى ع التلفزيون.. بس بلاش نكد وتعدى تسحى للصبح عليكى وعلى بختك...هاتى حاجة تفرفشك كده..

روحى لمعالج نفسي...وإذا عملتيها ف مصر هيودوكى السرايا الصفرا ف فكك من الحل ده وكفاية عليكى التليفزيون ياماما


 كتبتها:مريم أيمن: خريجة كلية ألسن  عملت بالترجمة والتدريس والبحث.. تعمل حالياً بدوام كامل كأم لطفلين.تعشق التاريخ واللغات والقراءة والتدوين والانترنت..تهدى كتاباتها لزوجها العزيز وأولادها الأحباء.. مصدر عذابها وسعادتها والهامها.