عبد الشافى: سواق «توك توك».. ونفسى فى واحد ملك.. وهمى أجوز أخواتى البنات
عبدالشافى وعبدالرحمن شابين من نفس العمر واحد مش مكمل تعليمه والتانى بيتعلم وبيشتغل، اتوجدوا فى بلد بتعيش ظروف الكل عايشها، ومبتفرقش بين أى حد، «اتكلم» اتقبلت معاهم وحورتهم عن حياتهم ويومياتهم ومتاعبهم وأمنيتهم فى اللى جاى.
▪ عرفنا بيك وبحياتك؟
- اسمى عبد الشافى محمد عندى 20 سنة بشتغل سواق توك توك، بعد ما سيبت التعليم من الإبتدائية علشان اقدر أساعد والدى فى المصاريف لان مفيش وقت ولا فلوس أنى اكمل تعليمى انا ليا 3 أخوات بنات لسه عايزين يتجهزوا، ووالدى شغال عامل باليومية يعنى يوم معاه قرش وأيام معهوش، والمشكلة فى شغلنتنا دى ان ملهاش دخل ثابت يعنى ساعات اشتغل كويس من الصبح لبليل وبيدخلى أكتر من 500 جنيه وساعات داخلى مش بيتعدى الـ 200 جنيه، وانا اصلا التوك توك اللى شغال عليه مش بتاعى انا بأجره 8 ساعات فى اليوم أشتغل عليه وبدى لصاحبه نسبة من اللى بيطلعلى.
▪ بتقضى يومك إزاي؟
- أنا بصحى على الساعة 12 وبنزل شغل من 3 لغاية 11 وبعد كده بروح أو أخرج مع صحابى عشان محسش بالملل أصلى بصراحة مش بحب الشغل قوى بس هاعمل ايه.
▪ بتابع اللى بيحصل فى البلد؟
أنا بتابع الأحداث اللى بتحصل من التليفزيون وماليش فى القراية خالص بس بحب أسمع التليفزيون وبرامج التوك شو زى بتاع معتز الدمرداش ولميس الحديدى.
▪ ايه هى مشاكلك؟
- الغلاء طبعا.. كل يوم الحاجة بتغلى والفلوس اللى جاية بتقل وعدم الاستقرار اللى البلد فيه بتخللى الشغل يوم فيه ويوم مفيش.
▪ بتتمنى إيه فى السنة الجديدة؟
- عايز الريس يهتم بسواقين التكاتك ويعمل لهم نقابة خاصة بيهم تهتم بمشاكلهم والصعاب اللى بيواجهوها ويكون لنا مرتب ثابت ويبقى فيه مشروع يساعدونا بيه أنى أجيب توك توك يبقى ملكى عشان اللى أكسبه محدش يقاسمنى فيه.
