السوشيال ميديا: إحنا معاك يا صلاح بس متمشيش

ابدى نشطاء مواقع التواصل الاجتماعى دعمهم الكامل لنجم المنتخب المصرى ونادى ليفربول محمد صلاح بعد تقرير «سى إن إن»، الذى زعم اعتزال النجم اللعب دوليا على خلفية استغلاله سياسيا، بعد لقائه مع الرئيس الشيشيانى رمضان قاديروف، فيما نفى المنتخب المصرى هذا الأمر، مؤكدًا أنه غير صحيح، دشن العديد من المغردين هاشتاج «أنا مع صلاح»، على موقع التدوين المصغر تويتر حيث تصدر قائمة الأكثر تداولا تضامنًا مع صلاح.
وقال أحد المغردين عبر الهاشتاج: «والله يا صلاح أنا معرفش الموضوع ايه بالظبط بس أنا كده كده معاك معاك».
وقالت إحدى الناشطات عبر حسابها الشخصى على فيس بوك: «لحد كام يوم فاتوا مصر كلها كانت رافعة صلاح للسما وبيقولوا (أملنا الوحيد فى كأس العالم- اللى مشرفنا فى العالم- رمز الأخلاق- اللى عمره ما نسى أهله وناسه وبلده).. النهاردة الناس كلها نزلت بيه لسابع أرض (يعنى هو صلاح عمل ايه لمصر-عاوز يسيب المنتخب مع السلامة: أنا بيك من غيرك مش فارقة قدامك اهو لسه بغنى- أبوتريكة عمره ما كان يفكر يعمل كده- ازاى صلاح يتورط فى موضوع رئيس الشيشان من غير ما ياخد باله).. إحنا مرعبين وبنخوف والله العظيم.
وأضاف آخر قائلا: «هو ليه أى حد كويس عندنا لازم نهدمه معنويا ليه مش بنقدر قيمة الناس الحلوة اللى رافعة اسم بلدنا مصر فى الخارج.. بنحبك يا صلاح وبندعمك ومش هنسيبك».
وأكد آخر عبر تويتر: «100 مليون مصرى جنبك ومعاك يا صلاح وأيا كان القرار اللى هتأخده ومهما حصل مش هنسيبك وهندعمك.. كلنا معاك يا صلاح»، وقالت أخرى: «بنحبك يا صلاح بس متمشيش».