«أنا مش ساحر وطالبت مجالس الإدارات يساعدونا فى شيلة الشركات الخاسرة»

شهدت لجنة الصناعة بمجلس النواب برئاسة النائب المهندس محمد فرج عامر، حوارا ساخنا بحضور وزير قطاع الأعمال العام هشام توفيق حول أوضاع  الشركات، وقال وزير قطاع الأعمال العام «لدينا ٨ شركات قابضة و١٢١ شركة ولدينا ٤٨ شركة وعدد العمالة بها ٢١٥ ألف عامل، كانت تحقق خسائر والرقم اختلف العام الجارى لكن مش هقول كام، وما تعانيه من خسائر حالية هى بسبب تراكمات بمرور الوقت وأرفض ذكر الأسباب لأنه موضوع يطول شرحه».
وأضاف الوزير»جمعت مجالس الإدارات علشان  يشاركوا معانا فى حمل الشيلة وأنا مش ساحر وهناك دراسة وافية عن القطاع والشركات الأكثر خسارة لنرى المستقبل والفرص والضعف داخل الشركات، جار حصر الأصول لتسديد المديونيات وهناك ديون بالمليارات للكهرباء والغاز».
واستكمل «فى الشركات العائلية أو شركات المال، وتخسر بنشوف الأسباب ونحط فلوس لإنقاذ الموقف، أما قانون قطاع الأعمال بيقول لما بنخسر ٥٠٪ من رأس مال الشركة بنقف ونختار سحب باقى الفلوس أو نكمل، وأنا حضرت اجتماعات جمعيات عمومية كتير لشركات وبتنتقد الجمعية العمومية الخسائر لكن المساهمين بيقولوا الشركة دى تتصفى، ورغم ضخ أموال فوق الخسائر لتعويضها لكن الفلوس اللى بتروح مبترجعش، ولدينا ٧٣ شركة كسبانة وبتوزع أرباح وصافى حقوقها وصل ٦٩ مليار جنيه».
وقال «ممكن نعمل مصنع لغاية ما يكسب ونطلع منه وندخل فى مصنع تانى وهو ما أشار له الرئيس عبدالفتاح السيسى فى بنى سويف أثناء افتتاح مصنع أسمنت، فقال اننا ليه هنقعد فى المصنع ده على طول ممكن نطرحه فى البورصة، ولذلك نحن نتحدث عن طرح ٣٠ إلى ٤٠٪ فى البورصة من شركات الحكومة وننشئ أخرى، فلا يخفى على أحد أن خسائر الشركات لدينا بلغت العام الماضى ٦.٧ مليار جنيه»، على حد ذكر وزير قطاع الأعمال.
ورد على ما أثاره أحد النواب من عدم الاستثمار الصحيح لإمكانيات قلعة الحديد الحكومية «شركة الحديد والصلب المصرية فى التبين»، فرد الوزير قائلاً: «من شركة الحديد والصلب احنا مش عايزين مكسب احنا عايزين نحافظ على الـ٩ آلاف أسرة اللى شغالين ووجدنا الشركة بتخسر من عام ٢٠٠٩ ووجدنا أنها تعتمد على حديد المناجم».