يوميات شيماء وعباس

الورقة الأهم فى الجواز

بعد أسبوعين من الجواز كده ومكالمات كتير بينى وبين المأذون علشان قسيمة الجواز نجحت انى أقابله واخدها منه، وكنت فرحان أوى بيها ومبسوط ان بقى معانا قسيمة الجواز، ومن كتر مانا مبسوط بيها كنت بفكر أبروزها فى البيت.
لكن أيام قليلة اووى واكتشفت أن الورقة دى مش أهم ورقة فى حياتنا، ودا حصل لما لقيت شيماء معلقة ورقة فى المطبخ على التلاجة وطالبةه شوية طلبات كده داخله فى 500ج بس.. وحطوا تحت بس دى خطوط كتير.
المهم جبت الطلبات وأمرى لله، السؤال الاهم من شيماء بقى مكنش عن الطلبات على قد ما كان عن «الرسيت» بتاع الطلبات علشان نحسب صرفنا قد أيه.
ومن يومها أكتشفت أن فى ورق كتير اهم ورقة قسيمة الجواز اللى والله بتطبيقة أيد المأذون لحد دلوقتى فى درج الشرابات.