بطلة المصارعة سمر حمزة: مبعرفش ألعب غير لما أسمع دعوتها «ربنا ينصرك»

حرصت «روزا جاردن» على إجراء حوار مع البطلة سمر حمزة بطلة العالم فى لعبة المصارعة وذلك للحديث معها حول بطولاتها وإنجازاتها ودور والدتها العظيم خلال مشوارها الرياضى
■ ما دور والدتك خلال مشوارك الرياضى؟
ــ «مامتى» ليها دور كبير جدًا فى حياتى الرياضية وهى إللى دخلتنى منذ الصغر فى الرياضة وكانت حابة تشوفنى بطلة كبيرة والحمد لله قد كان.
■ هل هناك طقوس معينة تفعلها والدتك وقت مبارياتك ؟
ــ مفيش طقوس معينة ولكنها دائمًا تكلمنى تطمن عليَّ وعلى التمرين وتقولى كلام يشجع.
■ ما أبرز المواقف التى جمعتكما فى حدث رياضى ؟
ــ فى بعض المباريات بكون محبطة جدًا وحاسة أنى هخسر ولكنها بتتكلم معايا تشجعنى وتتوقع فوزى وبالفعل بكسب مع أنى قبل هذه المباريات بكون متأكدة من الخسارة.
■ ما أول هدية عيد أم قدمتيها لها؟
ــ ترد ضاحكة كانت وردة مثل جميع الأطفال.
■ هل توقعت والدتك وصولك لتلك المرحلة من النجاح؟
ــ أكيد ومازالت تنتظر منى أفضل من ذلك.
■ ما أبرز الدعوات التى تقولها والدتك لك؟
ــ ربنا ينصرك على أعدائك وتكونى مستورة دايمًا.
■ هل صاحبتى والدتك من قبل لمباريات لتشاهدك من المدرجات؟
ـــ مرة واحدة فقط مش خليتها تتكرر لأنى بتشتت جدًا وبكون خايفة على زعلها فى المدرجات لو خسرت وشكلها أمام الناس.
■ ما هدية عيد الأم السنة دى؟
ــ هجيب حاجة حلوة هى بتحبها.
■ عند سفرك للمباريات ماذا تفعل والدتك معك؟
ــ أولًا بتقوم بتجهيز الطعام الخاص بى لأنى وقتها بكون بخس..ثانيًا بتتكلم معايا قبل السفر على طول بتقولى ركزى خلى هدفك إنك تكسبى وخلى أملك فى ربنا إنك اتمرنتى وتعبتى اعملى إللى عليكى علشان لولا قدر الله رجعتى خسرانة متزعليش من حاجة وتضايقكى.
■ أخيرًا وجهى رسالة إليها؟
ــ أمى عمرى ما أقدر أعوضها وهتفضل هى الحاجة الحلوة إللى فى حياتى.
■ بعيدًا عن والدتك.. سمعت أنه عرض عليكى من قبل التجنيس واللعب باسم بلد آخر؟
ــ آه كتير أبرزها الهند.
■ هل هناك دعم من الاتحاد الخاص باللعبة؟
ــ موضوع الدعم فى مصر صفر ومش أنا بس ده حال جميع الألعاب الفردية.
■ ما آخر الاستعدادات لبطولة طوكيو ٢٠٢٠؟
ــ حتى الآن مش عارفة راسى من رجلى الأهم حاليا بطولة العالم فى شهر ٩ المؤهلة للأوليمبياد من المركز الأول حتى الخامس أنا بتمرن وبعمل إللى عليا حتة الدعم أو السفر مش بتاعتى لسه هنشوف ايه الجديد الفترة المقبلة.
■ ما أصعب مباراة خلال مشوارك حتى الآن؟
ــ الأصعب كانت فى بطولة العالم لأنى كنت مصابة فى دهرى وكان فاضل يومين على الماتش ومكنتش هشارك وأخدت مضاد حيوى ولعبت وزن أعلى من وزنى ومكنتش مذاكرة الناس إللى هتلعب قدامى ووصلت قبل النهائى الحمد لله.
■ هل تشعرين بالظلم الإعلامى وما رسالتك للإعلام الرياضى؟
ــ دى حاجة ترجع للمسئولين سواء الاتحاد أو الوزارة لابد من وجود حد متخصص للألعاب الفردية والاهتمام به.