يوميات شيماء وعباس
الشيف شربينى ..
كأى اتنين لسه متجوزين من شهور، وبيفكروا يغيروا من شكل شقتهم وكده ويعملوا حاجات مختلفة فقررنا إننا نعمل حيطة كبيرة عليها صور الناس اللى بنحبهم، اللى هما المفروض يكونوا أصحابنا وأقاربنا وحاجات كده، لكن فجأة لقيت شيماء بتقولى إحنا هنحط صورة للشيف شربينى، على طول قلت الحمد لله الزوجة اللى بتحب الأكل رزق .. المهم كان إصرار شيماء إنها تحط صورة الشيف شربينى نفس إصرارى أن صورة صبحى صاحبى مثلًا، وكأن الشيف شربينى بعد ما بيخلص الأكل اللى بيعمله كل يوم فى الحلقة بيشيل لشيماء نصيبها منه.. يالا مش مشكلة أنا كمان بحب الشيف شربينى أوى وبصراحة كده ببقى عايز أعض الشاشة وهو بيعمل الأكل.