أحمد قطاوى نجم طنطا بعد الصعود للأضواء: «مش هنكون ضيوف شرف فى الممتاز»

حرصت جريدة روز اليوسف على إجراء حوار مع أحمد قطاوى أحد اللاعبين المميزين والأساسيين فى فريق طنطا الصاعد حديثا الى الدورى الممتاز وذلك لمعرفة طموحه خلال الفترة القادمة وما أبرز الصعوبات التى واجهت أبناء السيد البدوى بالدرجة الثانية:

■ فى البداية.. مبروك على الصعود إلى دورى الأضواء؟
- أشكرك الله.. ربنا يبارك فيك وبالتوفيق للجميع خلال الفترة القادمة.
■ ماهى الصعوبات التى واجهت الفريق خلال الموسم الحالى بالدرجة الثانية؟
- فى دورى الدرجة التانية الدنيا اصعب بكثير من الممتاز احنا كنا فى مجموعة الموت كلها اندية كبيرة ولها جماهير عريقة ولحد الجولة قبل الاخيرة ٨ فرق بتنافس على الصعود لكن الحمد لله معانا لعيبة رجالة وجهاز محترم وإدارة وفرت لينا كل حاجة وورانا جمهور جميل فى كل ماتش بره وجوه معانا.
■ ما بدايتك فى كرة القدم حتى وصلت إلى نادى طنطا؟
- بدايتى فى بلدى قرية الجوسق مركز بلبيس محافظة الشرقية من سن ٩ سنوات وكان مدربى كابتن عبد الرحمن نيدة وبعدها نادى الشرقية مع الكابتن هشام علام لحد سن ١٥ سنة وانتقلت الى نادى المقاولون العرب موسم والمسابقة اتلغت ثم انتقلت الى نادى الزمالك ولعبت ٥ سنوات واتصعدت فريق اول ثم انتقلت الى نادى طلائع الجيش ثم الداخلية ثم المصرى ثم طنطا.
■ هل هناك فرق شاسع بين اللعب فى الدورى الدرجة الثانية والممتاز؟
- فرق كبير.. الدرجة الثانية الاجواء والفرق تدعم بطريقة كويسة كل الفرق عايزة تصعد والماتشات كلها صعبة بس توفيق ربنا كان معانا.
■ ما أبرز المراكز التى تجيد اللعب بها؟
- الحمد لله بلعب «هاف رايت وهاف لفت وبلاى ميكر وهاف دفندر».
■ ما المباراة الأصعب لكم هذا الموسم؟
- ماتشات كتير كانت صعبة وفى ملاعب صعبة اى فريق يأخذ بونط فيها فى ملاعب ترتان وجمهور صعب جدا الجزيرة والحمام المطروحى وتلا والمحلة الغزل والبلدية والمنصورة والرجاء وابوقير والاوليمبى وكل الفرق.
■ بصراحة.. انتماؤك أحمر ولا أبيض؟
- انتمائى اولا للفريق الذي ألعب له حاليا طنطا بس الاصل الزمالك ابيض وربنا يكرمهم ويكسبو الدورى والكونفدرالية والكاس ان شاء الله.
■ اخيرا ما طموحك خلال الفترة القادمة؟
- طموحى نفرح جمهور طنطا ونعمل موسم كويس ومنكنش ضيوف شرف ومعانا لعيبة خبرة لعبت كتير فى الدورى الممتاز وتقدر تعمل نتائج كويسة ومدرب محترم مش واخد حقه واسلوب محترم ومحبب كل اللعيبة فيه سواء بتلعب او لا.. وبشكر الكابتن ايمن المزين والجهاز كله كابتن عبدالناصر محمد المدير الفنى السابق والكابتن مصطفى عسكر بداية الموسم مكنش فيه توفيق وكان فيه مشاكل اللعيبة كانت عايزه تمشى واللعيبة كلها كان جاى لها عروض بس الحمد لله ربنا كرمنا فى موسم صعب.