صيام رمضان

«أشعار بيرم التونسى»

أنا أمدح المولى الغفور الودود
اللى تجلت رحمته فى الوجود
الأرض والسماوات على شهود
أشهد له سبحانه بعز سلطانه
ومن صميم قلبى أشكر له إحسانه
يا مؤمنين وحدوا الله
لا إله إلا الله

سبح إله العرش واخضع له
هو الوحيد اللى أنت رزقك عليه
الملك والملكوت عطية إيديه
لو مرة ينظر لك لابد يغفر لك
ويدخلك جنة فيها ما تتمنى
يا مؤمنين
يا مؤمنين
يا رب تلطف بالعباد فى قضاك
أنت اللى مالك من شريك فى علاك
تبلغ الصايم نهاية رحمتك ورضاك
وتحفظ الإسلام على مدى الأيام
واللى اعتماده عليك يا رب لا ينضام

سبحانه من خلىّ الأهله تدور
والشهر بالخيرات علينا يدور
يا صائمين لاحت نجوم السحور
على السحور يا للا قبل الأوان يا للا
صوموا بأمر الله والأجر عند الله