«يارا أشرف».. نجمة فريق الطيران الفائز بالدورى: الناس كانت بتسخر منى زمان ويقولوا «الكورة لعبة رجالة بس»

يارا أشرف نجمة الكرة النسائية فى نادى الطيران تحدثت فى حوار خاص مع «روزاليوسف» عن حكايتها مع الرياضة واهدافها واحلامها ..كل هذا واكثر من خلال السطور التالية :

■ بداية عرفينا بنفسك أكثر؟
انا يارا أشرف عندى 21 سنة لاعبه فى نادى الطيران، بلعب فى مركز جناح أيسر و أيمن.
■ كيف بدأتى مسيرتك مع كرة القدم؟
فى البداية اخويا مازن هو اللى كان بيدرب نادى 6 أكتوبر وانا كنت بأخد الكورة بلعب جنبهم، الكابتن عمر عزب شاف عندى الموهبة لانه كان بيدرب بنات فى الاول فأخدنى ألعب معاهم، بدأت مع الولاد من وانا عندى 8 سنين لحد 11 سنة وبعد كده ذهبت الى نادى وادى دجله، وحاليًا اخويا بيدرب ناشئي بيراميدز مواليد 2001، كابتن عمر صاحب الفضل عليَّ فى اللى وصلت ليه وبيتابع معايا لحد الان.
■ ماذا كان رأى أسرتك فى إن تكونى لاعبة كرة قدم؟
كانوا بيشجعونى جدًا خاصة بابا لانه عاشق للكورة وكان بيلعب فى ناشئين النادى الاهلى.
■ ما المعوقات التى واجهتك خلال مسيرتك وحتى الآن؟
عدم وجود فرق كره قدم نسائية قريبة منى فى البداية، وعدم تقبل بعض الناس الغرباء لفكرة لاعبى كرة القدم والسخرية منى وانها لعبة للرجال فقط.
■ ما أصعب المواجهات مع نادى الطيران خلال مشواره بالدورى ؟
مباراتى الطيران ودجلة، والطيران والاعلاميين، الأولى انتهت بهدفين نظيفين للطيران، وكذلك الثانية ولكن بهدف نظيف.
■ ما كان شعورك بعد المكسب على دجلة وتتويج الطيران بالدورى؟
اكيد فرحانة جدا لان اللعيبة تستاهل الفوز، وده كان اقل حاجة أنهم ياخدوا الدورى بعد التمرينات والجهد اللى عملوه، وان شاء الله مش هيطلع من نادى الطيران ثانى.
■ ما طموحاتك مستقبلا ؟
طموحى فى المستقبل هو ان اخذ احسن لاعبة، و اكون كابتن كرة قدم نسائية.
■ ما مواصفات فتى احلامك؟
هو موجود بالفعل، انا مقرى فاتحتى على ضابط طيار، وخطبتى قريبا ان شاء الله.
■ موقف لن تنسيه على الاطلاق؟
أول مرة اشوف فرقة كرة قدم نسائية بالكامل والعب معاهم وهى كانت فرقة وادى دجله لما كان عمرى 11 سنه، وفى موقف كمان وهو ان كان معمول حفلة المفروض كنت استلم فيها هداف الدورى موسم  2016/2017 وانا ما كنتش اعرف ولما سألت مين الهداف قالوا لى ان انا الهدافة.
■ ما عاداتك وتقاليدك خلال الشهر الكريم؟
بصحى من النوم لو عندى حاجة بعملها وبعد كده بحب اقعد مع ماما شوية بدخل معاها المطبخ قبل الفطار بساعتين اساعدها لو فى حاجة وبقرأ قرأنا وأكثر حاجة بحبها لما العيلة كلها بتتجمع فى رمضان.
■ ما أكلتك المفضلة ؟
بحب البلح باللبن، وبحب المسقعة والبشاميل وكل اكل ماما بصراحة.
■ لاعبك المفضل محليا وعالميا؟
محليًا وليد سليمان لأنى أهلاوية، وعالميًا ليونيل ميسى لأنى بشجع برشلونة، وطبعا محمد صلاح.
■ كلمة اخيرة تحبى توجيها لأى شخص؟
احب اشكر اهلى «ماما و بابا» و مازن و سلمى اخواتي، دول أحلى حاجة فى حياتى و دائما واقفين جنبى بيشجعونى خصوصا ماما دى اكتر واحدة تعبت معايا، بالإضافة للكابتن احمد كمال وكابتن عبد الناصر وكابتن عبد الفتاح لانهم وقفوا جنبى كتير اوى وكانوا بيشجعونى ان اكون افضل  دائما.