هاجر رمضان نجمة الكرة النسائية: الجواز مش فى دماغى

تحتاج كرة القدم النسائية فى مصر لمن يسلط الضوء عليها، ويبرز المواهب الشابة العديدة التى تمتاز بالعديد من المهارات، شأنها شأن نظيرتها للرجال، هؤلاء اللاعبات تحتاج لمن يظهرهن إلى النور لكى يتعرف عليهن عشاق المستديرة، ومن بين هؤلاء النجمات «هاجر رمضان» لاعبة فريق الطيران بطل الدورى الموسم المنصرم التى فتحت قلبها لـ«روزاجاردن» لتتحدث عن بدايتها وأمنياتها فى المستقبل:

■ فى البداية حدثينا عن نفسك؟
- اسمى هاجر رمضان، عندى 18 سنة ولسه بدرس، بلعب فى نادى الطيران ولعبت منتخب مصر تحت 17 سنة تصفيات كأس عالم.
■ كيف بدأتى الرياضة بشكل عام؟ وكرة القدم بشكل خاص؟
- أنا مجربتش أى رياضة غير الكورة كان عندى 5 سنين أول لما بدأت، كنت بنزل أنا وأخويا دايمًا فى الشارع وكنت بلعب مع صحابة، واحدة واحدة لقيت نفسى كويسة فى الكورة وعندى الموهبة.
■ متى كان انضمامك للطيران ولعبتى فى أندية قبل ما تلعبى هناك؟
- انضميت للطيران تقريبًا وأنا عندى 10 سنين فى سنة2011، ولحد دلوقتى لسه مكملة معاهم وبلعب مع الفريق الأول وكابتن فرقة الناشئين، وقبل الطيران لعبت شوية فى الشارع مع الولاد اللى هما الجيران قعدت حوالى سنتين أو تلاتة فى الشارع بعد كدا روحت نادى دار الدفاع الجوى لعبت سنتين مع فريق الولاد بردو بعد كدا روحت للطيران.
■ من الذى ساعدك خلال ممارستك اللعبة؟
- اللى ساعدنى أمى وأخواتى دايمًا بيشجعونى انى اكمل وماما عيزانى اواصل وانا نفسى اوصل عشان افرحها واوريها انى مكنتش بضيع وقت، غير كدا ناس كتير من صحابى بيشجعونى ودايمًا يقولولى انى ان شاء الله هبقى حاجة.
■ ما الصعوبات التى واجهتيها مع الطيران خلال الموسم الحالى؟
- هو مش أنا بس إلى واجهت صعوبات هو النادى كله واجه، لاننا الموسم اللى فات حصل عندنا كذا إصابة واصابات كانت تقيلة ورخمة منها رباط صليبى وغضروف وده طبعًا أثر كتير جدًا فى الفرقة وبالرغم من ده كملنا واخدنا الدورى.
■ ما أمنياتكم كلاعبات مع الطيران خلال الموسم المقبل؟
- أمنيتنا أننا نحافظ عالدورى ومايروحش مننا، وهو إن شاء الله مش هيروح.
■ هل تلقيتى عروضا من أندية أخرى؟
- لا للأسف.
■ هل تتابعين كرة القدم الأوروبية؟ ومن هو فريقك المفضل؟
- أيوة بتابع الدورى الإسبانى والإنجليزى وفريقى المفضل هو برشلونة.
■ من مثلك الأعلى محليًا وعالميًا؟
- مثلى الأعلى محليًا عبدالله السعيد وكان أبوتريكة، عالميًا هو ميسى ولاعبة منتخب أمريكا ونادى أورلاندو برايد اسمها أليكس مورجان.
■ هل أنت متزوجة؟
- لا، الحمد لله (تضحك)
■ ما مواصفات فتى أحلامك؟
- مفيش مواصفات فى دماغى لأن الموضوع مش فى دماغى.. بس نفسى يكون لاعيب كورة زى أو لو مش لاعيب كورة يشجعنى ويبقى واقف معايا ويكون هو رقم 1 فى الدعم ليا معنويًا.
■ ما الأمنيات التى تسعى لتحقيقها فى المستقبل؟
- هو فى حاجات كتيرة بصراحة منهم انى احترف فى الدورى الأمريكى للكرة النسائية، لأنه أقوى دورى فى العالم واوصل مع المنتخب بتاعى كأس العالم واقابل اليكس مورجان.