الخميس 28 مارس 2024
رئيس مجلس الإدارة
هبة صادق
رئيس التحرير
احمد باشا

نورا محمد: التتويج مع الطيران بالدورى من أسعد اللحظات فى حياتى

نورا محمد: التتويج مع الطيران بالدورى من أسعد اللحظات فى حياتى
نورا محمد: التتويج مع الطيران بالدورى من أسعد اللحظات فى حياتى




كتب- محمد سامى


تعد أبرز المواهب فى كرة القدم النسائية، حاصلة على لقب هداف الدورى لثلاثة مواسم متتالية، مهاجمة نادى الطيران نورا محمد التى تألقت وساهمت بأهدافها فى حصول فريقها على درع الدورى الموسم الماضى بعد غياب لسنوات عديدة، نورا فتحت قلبها لـ «روز اليوسف» لتتحدث عن أسباب تتويج الطيران بالدرع، وكيف بدأت مسيرتها مع الساحرة المستديرة:
■ كيف كانت بدايتك مع كرة القدم؟
- كابتن حسام «مدرس الألعاب» فى المدرسة كان يلاعبنى مع الأولاد ماتشات، وكان شايف إن عندى الموهبة أن ألعب كرة قدم، وكنا نلعب دورات يوم الخميس، وكان يلاعبنى معهم وأنزل أكسب الفريق، لحد ما نمى في داخلى الموهبة.
■ من الذى ساعدك فى ممارسة اللعبة؟
- خالى الله يرحمه كان يحب كرة القدم، وكان  يلعب فى المقاولون العرب، وساهم فى تنمية موهبتي، وطبعًا والدتى تحب أن أكون ناجحة فيها أوي.
■ ما  الصعوبات التى واجهتها فى بداية مسيرتك؟
- كنت أقول مفيش كرة نسائية، أنا بنت إزاى تلعب كرة، لحد ما روحت مع أحد أقاربى كان بيدرب فى المقاولون، وكنت ماسكه كرة وبلعب بيها على جنب وبنطط مع نفسى، الكابتن اللى كان مشرف على التدريب شافنى وقال البنت دى قريبة مين فـ قريبى رد وقاله جايه معايا، قاله ليه سايبها كده خليها تلعب فى وادى دجلة أو الطيران، وتانى يوم روحت نادى الطيران وقدمت فيه، وكنت مبسوطة جدًا اليوم ده، لأن الواحد مكنش هيبقى ليه وجود أساسًا لأن ألاقى كرة نسائية كانت صعبة أوي.
■ ما  المركز الذى تلعبين فيه؟
- مركزى فرود «مهاجم»، وهدافه الدورى 3 مرات متتالية.
■ ماذا عن الموسم الماضى مع نادى الطيران؟
- كان موسمًا صعبًا جدًا، مرينا بإصابات كثيرة، وملاعب رملة صغيرة جدًا، وكمان الإصابات مكنتش سهلة وفى لاعبات مهمة فى الفريق، مثل «هيام عبدالحفيظ» و«رحاب عيد»، والحمد لله قدرنا نفرح الناس المصابة ونفرح نفسنا والجهاز بالتتويج بالدوري، لأننا كنا رجالة ولعبنا بروح.
■ ما كان شعورك بعد الفوز بلقب الدورى؟
- شعور حلو جدًا، تعبان موسم كامل، وشيء يكافؤك فى الآخر دى من أحلى اللحظات فى حياتى.
■ ما أصعب المواقف التى مرت عليك وعلى الفريق ككل؟
- زى ما قلت الإصابات، والملعب الرمل اللى كنا بنتمرن عليه كان صغير جدًا، لان ملعب الـ 11 كان بيتجدد، وأتمرنا حوالى 3-4 شهور على ملعب الرمل، وعشان تعبنا واجتهدنا ربنا كلل مجهودنا بالنجاح، لكل مجتهد نصيب.
■ هل تحلمين بالاحتراف الخارجى؟
- أكيد ان شاء الله فى احتراف خارجى، وأى لاعب كرة بيتمنى أنه يحترف.
■ ما طموحاتك خلال الفترة القادمة؟
- بشتغل على نفسى حتى لو فى أجازة أنا بنزل وبتمرن وبدوس واشتغل على نفسى أكثر وأكثر، عشان لو ربنا كرمنا نأخد الدورى تانى بإذن الله، ومش هيطلع من عندنا أساسًا، وحتى لو مكنتش فى بيتى نادى الطيران مثلًا فى احتراف خارجى يبقى حاجة كويسه للنادى وللاعبات فى الفريق أن الدورى يفضل فى نادى الطيران.
■ من مثلك الأعلى محليًا وعالميًا فى كرة القدم؟
- محليًا محمود حسن تريزيجيه، وعالميًا كريستيانو رونالدو.
■ ما العوامل التى تساعد كرة القدم للسيدات على التطوير؟
- التقصير من جانب الإعلام، ودلوقتى الإعلام بدأ يهتم بينا، وعدم وجود دكتورة سحر الهوارى مأثر جامد طبعًا، وكان ناقصنا إعلام والحمد لله بقى فى شوية وربنا يسهل.
■ كلمة أخيرة تحبى تقوليها؟
- أشكر كابتن «أحمد كمال» المدير الفنى لنادى الطيران والجهاز الفنى بالكامل، وأحب أشكر النادى واللاعبات اللى كانوا رجالة الموسم الماضي، وشكرًا جدًا لـ «أمي» لأنها بتقف جنبى فى كل حاجة، وهى سبب رئيسى فى اللى أنا وصلتله ده.