أحمد صالح نجم الأبيض السابق: صفقات الزمالك «جامدة».. ومصطفى محمد أفضل مهاجم فى مصر
روزاليوسف اليومية
أحمد صالح نجم نادى الزمالك والاتحاد السكندرى ومنتخب مصر السابق حرصت «روزاليوسف» على محاورته والتعرف منه على طموحة فى التدريب والعروض التى تلقاها مؤخرا.
■ ما سبب رحيلك عن نادى النجوم هذا الموسم؟
- أنا اعتذرت لظروف خاصة ونحن نحتل المركز العاشر بالدورى وبجد الناس عملونى معاملة طيبة جدا وكنت سعيد جدا بالتواجد معاهم .
■ هل توافق على العمل بقطاع الناشئين ام بالفريق الأول بالزمالك لو عرض عليك؟
- أنا فعلا عرض عليا لكنى رفضت لانى أطمح بالعمل بالدورى الممتاز أو الممتاز «ب»، نادى الزمالك دا بيتى وتوليت تدريب المستبعدين أثناء وجود جروس.
■ ما أسباب تعرض الزمالك للمشاكل دائما عقب الفوز بالبطولات؟
- المشاكل دائما موجودة فى كل الأندية ولكن الزمالك حالة خاصة لوجود المستشار مرتضى منصور وتصريحاته المثيرة للجدل لكن هو بالفعل قدر يبنى فريق وبيقدر يوفر كل شىء لكن تصريحاته دى والأمور الى فيها شد وجذب هى الى بتعمل الازمات.
■ ما رأيك فى صفقات الزمالك هذا الموسم؟
- صفقات مميزة جدا ولكن أتمنى أن اللاعب الكويس لا ينظر إليه كناشىء مثال مصطفى محمد اللى من وجهة نظرى أفضل مهاجم فى مصر وكنت أرى أننا بحاجة لاثنين من المهاجمين.
■ هل يوجد عروض فى الوقت الحالى؟
- جالى عروض كثيرة الفترة الماضية ولكن قلة الإمكانيات تقف عائقا ؛ أنا عاوز أشتغل وأنجح وعملى الفترة الماضية بنادى الزمالك ومنتخب مصر والنجوم وشربين خير دليل على كلامى وإن شاء الله هاخد خطوة مهمة.
■ هل نادى شربين قادر على الصعود للممتاز «ب»؟
- قادر على الصعود طبعا وعندنا إمكانيات كبيرة كوجود ستاد كبير مش موجود ف الدقهلية ؛ لكن شربين حرام تلعب ف القسم الثالث لازم الناس تتخلى عن بعض الامور علشان النادى يرجع لوضعى الطبيعى.
■ ما سبب رحيلك عن نادى شربين؟
أنا مش بشتغل كورة علشان الفلوس الحمد لله ولكن لما أتفق على شىء وميتمش دا اللى خلانى أستقيل الناس فى النادى كلهم اخواتى ولكن فى حاجات مكنتش أتمنى تكون موجودة فى الوقت دا وبعد ما رحلت الأمور وضحت للجماهير وفى أمور مش حابب أخوض فيها وللعلم ودا أول مرة أقولها حتى فى النادى ميعرفوش إن أنا فى الفترة دى كنت هجيب لاعب افريقى يلعب فى الدورى العراقى على نفقتى الخاصة لانى كنت حابب أنجح وبتمنلهم التوفيق والصعود.
■ من هو أفضل مدير فنى تدربت معه؟
- أجنبى : كبرال
مصرى: الكابتن فاروق جعفر والذى أكن لة كل احترام وتقدير
■ من هو خليفة أحمد صالح فى مصر؟
- مفيش لاعب شبه حد ولكن حازم إمام وعمر جابر ومحمد هانى والنقاز مميزون جدا.
■ ما الفرق بين جروس وميتشو؟
- متقدرش تقارن الاثنين ببعض دلوقتى يمكن ميتشو لسه بادى وبصماته لسه مش واضحة بالنسبالى نقدر نقيمة بعد ٦ مباريات من الدورى العام.
■ هل لو عرض عليك تدريب شربين هتوافق؟
- فى الفترة الحالية لاء لانى مش بشتغل درجة ثالثة مش علشان أنى أكبر منها ولكن معرفش أوعد لاعب بحاجة ومقدرش أحققها لعدم وجود أمكانيات فى الدرجة دى عموما وبالفعل رفضت عروضا كثيرة لنفس السبب.
■ وجه كلمة لجماهير شربين؟
- جماهير شربين على دماغى وكانوا واقفين جمبى وأنا ماسك النادى وكانوا بيحضروا التمرين باستمرار بجد أتمنى صعود الفريق من أجل هذه الجماهير.