إبداع

فى ذكرى ميلاد بيرم التونسى
 
شعراؤنا شموس سماء الإبداع، وإن ظن البعض أن شموس شعرائنا تغرب برحيلهم عن الدنيا، لكن شموس الإبداع الباقية تنتظر كل يوم نورهم من جديد، تحتفل صفحة إبداع اليوم بشاعر العامية الكبير بيرم التونسي» 4 مارس 1893 - 5 يناير 1961» فى ذكرى ميلاده، بنشر عدد من قصائده.
 
 
 
أنا فى انتظارك
 
 
انا فى انتظارك خليت نارى فى ضلوعى وحطيت
 
 ايدى على خدى وعديت
 
 بالثانية غيابك ولا جيت
 
 ياريتنى عمرى ماحبيت
 
 عايز اعرف لا تكون غضبان
 
 او شاغل قلبك انسان
 
 خليتنى من يأسى اقول الغيبة دى تغيب على طول
 
 وافتكر ايه اللى جنيت من ذنبى يسيئك مالاقيت
 
 ياريت ... ياريت
 
 اتقلب على جمر النار... واتشرد ويا الافكار
 
 النسمة احسبها خطاك والهمسة احسبها لقاك
 
 على كده اصبحت وامسيت
 
 وشافونى وقالوا اتجنيت
 
 ياريتنى عمرى ماحبيت
 
 تواعدنى بسنين وايام وتجيبنى بحجج وكلام
 
 وتسلم وتمر قوام او تخلف وتقول لى نسيت
 
 ياريتنى عمرى ماحبيت
 
الغش والغلا
 
الأكل والشرب فى إيد اللومنجية
 
 والطماعين اللى غلوا الملح والميه
 
 والغشاشين اللى فاقوا على الحرامية
 
 الشاى بالمفتشر مخلوط ملوخية
 
 والبن فيه الشعير تسعين فى الميه
 
 والميه والعيش برمله وطينه يا ملوخلية
 
 واللحم معروض بدون أختام رسمية
 
 والميه هيه اللبن ولا اللبن هيه
 
 أفاعى متسيبة من غير رفاعية
 
 ودنيا مترتبة ترتيب فلاتية
 
حا تجن
 
 
حاتجن ياريت ياخوانا
 
 مارحتش لندن ولا باريز
 
 دى بلاد تمدين
 
 ونضافه وزوق ولطافة
 
 وحاجة تغيظ
 
 مالاقيتش جدع متعافى
 
 وحافى
 
 وماشى يقشر خص
 
 ولا شحط مشمرخ افندى
 
 معاه عود خلفه
 
 ونازل مص
 
 ولا لب أسمر
 
 وسودانى وحمص
 
 وانزل ياتقزقيز
 
 حاتجن ياريت يا إخواننا
 
 مارحتش لندن ولا باريز
 
 ولا عركة فى نص الليل
 
 دايرة بالحيل
 
 وساحبها بوليس
 
 قدامها جدع متجرجر
 
 وشه متعور
 
 قال ايه دا عريس
 
 الخلق ماهى بتتجوز
 
 واشمعنى احنا مفيش تمييز
 
 حاتجن ياريت يا إخواننا
 
 مارحتش لندن ولا باريز
 
 ولا واحدة فى وش الفجر
 
 تبرطع ماليه الدنيا صوات
 
 قال ايه
 
 جوز خالتى ام احمد
 
 سلفة أخوها السيد
 
 مات
 
سبحانك ما أعظم شأنك
 
 والله الموت
 
 دا مفيد ولذيذ
 
 حاتجن ياريت يا إخواننا
 
 مارحتش لندن ولا باريز
 
 ولا واحد طالع يجرى
 
 وواحد تانى بيجرى وراه
 
 ويقول هاهع حصلتك
 
 يابن اللى ابصر أيه عاملاه
 
 لا الشارع غيط ياإخواننا
 
 ولا احنا بدارة
 
 ولا احنا معيز
 
 حاتجن ياريت يا أخواننا
 
 مارحتش لندن ولا باريز
 
 ولا واحد بيبيع حاجة
 
 يقول بريال وتاخدها بصاغ
 
 يا إخواننا دى حتى الإبرة
 
 تاخدها بدوشة وقلب دماغ
 
 حلفان
 
 وعراك
 
 ومناهدة
 
 ويمكن ضرب كفوف
 
 ياحفيظ
 
 حاتجن ياريت يا إخواننا
 
 مارحتش لندن ولا باريز
 
 ولا فيش ميت الف صعيدى
 
 بتوع يانصيب هاجمين
 
 ولافيش
 
 ميت الف معوض داعس
 
 جاى معاه صندوق ورنيش
 
 والله كرهت القهوة
 
 وحرمت أقعد ع الأفاريز
 
 حاتجن ياريت يا إخواننا
 
 مارحتش لندن ولا باريز
 
 حاتجن ياريت يا إخواننا
 
 مارحتش لندن ولا باريز
 
 دى بلاد تمدين
 
 ونضافة وزوق ولطافة
 
 وحاجة تغيظ
 
 

 


 
العامل المصرى
 
ليه أمشى حافى، وانا منبت مراكيبكم
 
 ليه فرشى عريان، وانا منجد مراتبكم
 
 ليه بيتى، خربان وانا نجار دواليبكم
 
 هى كده قسمتى؟
 
 الله يحاسبكم
 
 ساكنين علالى العتب، وانا اللى بانيها
 
 فارشين مفارش قصب، ناسج حواشيها
 
 قانيين سواقى دهب، وانا اللى ادور فيها
 
 يا رب ما هوش حسد
 
 لكن بعاتبكم
 
 من الصباح للمسا، والمطرقة ف إيدى
 
 
 صابر على دى الأسا، حتى نهار عيدى
 
 ابن السبيل انكسى، واسحب هرابيدى
 
 تتعروا من مشيتى
 
 واخجل أخاطبكم
 
 ليه تهدمونى وانا اللى عزكم بانى
 
 أنا اللى فوق جسمكم قطنى وكتانى
 
 عيلتى فى يوم دفنتى ما لقيتش أكفانى
 
 حتى الأسية، وانا راحل وسايبكم
 
 
الأرض
 
يا أرض مالك كرهتى كل سكانك
 
ويوم عواصف ويوم يشتد بركانك
 
رحيمة فاضت لنا بالخير أنهارك
 
طروب تعزف لنا الأنغام أطيارك
 
فى يوم زلازل ويوم يجرفنا طوفانك 
 
راح فين بهاكى وحلمك فين وحنانك؟ 
 
جميلة متزوقة فى وشى أزهارك 
 
كريمة ما ينقطع نخلك ورمانك
 
 
 
ظلمونى الناس
 
ظلمونى الناس ظلمونى والجانى فاتوه واتهمونى
 
 ظلمونى الناس ظلمونى والحق معايا وسقونى
 
 من أساهم ولاحنوا على ضعف ضنايا
 
 والدنيا على مساعداهم وأنا قلبى كبير ولالى نصير
 
 ولا أملك غير دمع عيونى ظلمونى الناس
 
 الظالم يعينوه على ظلمه ويزيدوا المسكين على همه
 
 الحق أهو باين فى إيدى ويقولوا دا الحق على
 
 والناس قاسين على المساكين
 
 حاربونى الكل وغلبونى
 
 ظلمونى الناس
 
 سلمت إليك أمرى ياربى
 
 غيرك ما لقيت يرحم غلبى
 
 البائس تعينه من فضلك
 
 والبائس تنظر له بعدلك
 
 أنا صنع إيديك وتكالى عليك
 
 أنصرنى على اللى ما نصفونى
 
 ظلمونى الناس
 
 

 
العيون
 
من العيون يا سلام سلم شوف واتعلم
 
عيون تقولك قصدك إيه بتبحلق ليه
 
وعيون تقولك أنا عارفاك والنبى ما انساك
 
وعيون تقولك روح يا رزيل يا بو دم تقيل
 
وعيون تقولك أنا حبيت ياللا بنا البيت
 
وعيون تقولك بالمحسوس أنا عايزة فلوس
 
وعيون تقولك إمشى يا واد أنا أم ولاد
 
وعيون بسر الحب تبوح كدا بالمفتوح
 
وعيون تسبل فوق الخد دى جد ف جد
 
وعيون تحقق فيها بشوق تهرب على فوق
 
وعيون ما تعرف زعلانة أو فرحانة
 
وعيون لها ضحكة ف وشك بس تغشك
 
وعيون كدا يبقم ساهتين صفر وباهتين
 
وعيون تبص وتتسفلق واقفه شلقلق
 
تحت البراقع تتكلم والدنيا نهار 
 
ما لكش شغل تعس عليه يا راجل يا حمار 
 
من يوم ما شفتك م الشباك يا جدع يا صغار 
 
ياباى كبه فى المخاليل يا ما هما كتار 
 
وعيون تقول انشالله ما جيت أنا رايحة الزار
 
 
وانشالله حتى تحوس وتدوس أنا عاملاه كار 
 
وعيون تقولك عندى معاد ويا السمسار
 
 
وتعرف القلب المجروح ما عليهش ستار 
 
وعمرها ما تكلم حد عيون أحرار 
 
بتقوللك ابعد عنى بذوق نظراتك نار
 
 
صباح مسا أهى سهتانة صاحبة أفكار 
 
وتبص من تحت اليشمك تلقى المنقار 
 
بالشكل دا عيون الخاينين تضرب بصفار 
 
وعيون تبرق وتبحلق عايزين مسمار
 
الفلاح
 
 
الأولة آه والتانية آه والتالتة آه
 
 الأولة عيرونى إن أنا فلاح
 
 والتانية أزرع وأقلع اللى نام وارتاح
 
 والتالتة آه للى أحبه شط منى وراح
 
 الأولة
 
 عيرونى ان أنا فلاح – بدفيه
 
 والتانية
 
 أزرع وأقلع اللى نام وارتاح – فى دهبية
 
والتالتة
 
 آه اللى أحبه شط منى وراح – فى صبحية
 
 الأولة
 
 عيرونى ان نا فلاح بدفيه – وعيشى حاف
 
 والتانية
 
 أزرع وأقلع اللى نام وارتاح فى دهبيه – بمقداف
 
 والتالتة
 
 آه اللى أحبه شط منى وراح فى صبحية – ما قال لى عواف
 
 الأولة
 
 مش بإيدى دا قضا محتوم
 
 والتانية
 
 ومسيرها ناس تغرق وناس حتعوم
 
 والتالتة
 
 ميت هم يرحل ألف هم يدوم
 
 الأولة آه والتانية آه والتالتة آه