طرحنا على الشباب السؤال الجوهرى: تعرف إيه عن الأوسكار؟
«الأوسكار» واحدة من أهم الجوائز عالمية بتقدمها اكاديمية فنون وعلوم الصور المتحركة الأمريكية كل سنة فى أواخر فبراير أو أوائل مارس على مسرح دولبى (كوداك سابقا) فى هوليوود، ورغم أنه فى جوائز تانية مهمة زى «السعفة الذهبية» و«ايمى اوردز» و«الجولدن جلوب» و«كان» وغيرها كتير من الجوائز العالمية، إلا أن «اتكلم» قررت تركز بس على الأوسكار، وتعرف إيه اللى يعرفه الشباب عن الجايزة المهمة دى اللى بيتبعها كل الناس فى العالم بشغف وانتظار شديد، ودا بمناسبة حفل توزيع جوائز الاوسكار اللى حصل الاسبوع الحالى وغطته كل وسال الإعلام فى العالم.
أحمد صلاح طالب بكلية الحقوق قال: رغم أننى بتابع حفلات الاوسكار ديما إلا أنى معرفش عن الاوسكار غير أن لما حد بيعمل فى السنة فيلم حلو بياخد عليه جايزة». أما ثريا فؤاد بتشتغل سكرتيرة فى شركة خاصة قالت: «أنا معرفش حاجة عن الاوسكار غير إنه مسابقة أفلام والفائز فيهم بياخد جوائز، وأنا فى العموم مش بتابع المسابقات دى أصلا لكن معنديش مانع اتفرج عليها من باب العلم بالشىء. فى حين قال محمد سيف طالب بكلية الهندسة: «الاوسكار دى حفلة بتيجى فى مارس وبتكرم أحسن الممثلين، والافلام الكويسة بالنسبة لهم هى اللى بتاخد الجوائز زى تايتانيك اللى اخد 11 جائزة فى اوسكار، وكمان اعرف أن شروط ترشيح الفيلم أنه ميقلش عن 40 دقيقة ويكون اتعرض فى كاليفورنيا».
ثريا فؤاد
مروة شوشة طالبة فى كلية رياض الاطفال قالت: «اللى اعرفه عن الاوسكار إنه عبارة عن جوائز تعطى لأحسن فيلم وأحسن مخرج وأحسن تأثيرات بصرية وهكذا، وعرفت عن حفلة توزيع الجوايز الأخيرة بالصدفة من أخويا ولولاه مكنتش هعرف إن فى حفلة من اساسه.
محمد سيف
أحمد تركى مندوب مبيعات قال: الاوسكار جائزة بيتنافس عليها أعمال فنية من مختلف الجنسيات واللى بيحصل عليها بيكون عمله السينمائى مبهر وعامل تأثير فى دور السينمات على مستوى العالم، والحقيقة انا مسمعتش عن الحفلة الأخيرة غير بعد إما عدت وانا فى الغالب مش من متابعيها رغم انى بحب اتفرج على نشرات فنية كتير.
محمد اشرف، مبرمج العاب الكترونية، بيقول: «حفلات الاوسكار دى حاجة تافهة أوى، واللى اعرفه عنها انها بتدى جوايز لأحسن تصوير واحسن فيلم واحسن ممثل، وبحس أنها شىء عادى ممكن يتفوت زى ماتشات الكورة بالظبط».
