..ولا إيه يا حج؟!

فى العادى أنا دايما بسمع البرامج اللى بتتعرض على قناة الحافظ او قناة الناس وانا قاعده فى اوضتى او لما أكون فى الصالة، وده عشان بابا بيبقى مخلى صوت التليفزيون عالى فى اوضته يعنى بيقول يمكن يسمعوا الناس الكومل دول و ربنا يهديهم، النهارده بقى انا كنت معديه كده وكان شغال برنامج فى الميزان اللى هو اصلا بالمرصاد سابقاً، كانوا عارضين مقطع فيديو من حلقة برنامج هنا العاصمة اللى بتقدمه لميس الحديدى، هو انا بس سمعت صوتها لأنهم كانوا عاملين غروشه فى الصورة اصل لميس طلعت عورة وعيب والنبى الشيوخ دول عليهم حاجات، (أسفة على لفظ شيوخ بس هم بيسموا نفسهم كده)، المهم انا بقى سألت الحاج والدى بقوله هم ليه عاملين الصورة كده مبوظينها، هو رد عليا رد جامد جدااا بصراحة افحمنى، قالى دى قناة محترمة مش بيجيبوا ستات فيها، قولتله ايوة صح هم ناس محترمه و دى قناة محترمة والناس كلها تشهد إن ده برنامج محترم، كمان هما شغلوا الفيديو مبوظين الصورة عشان مش بيعرضوا صور ستات على القناة المحترمة، وبعد ما يخلص الفيديو ينزلوا شتيمة فى صاحب الفيديو، ومش برضه هى دى القناة اللى اتشتمت عليها الهام شاهين، ودول برضه الناس اللى كانوا بيقولوا على حمادة بلطجى و شاذ، مش بقولك يا حاج قناة محترمة.