آه يا حكومة محدش بيحاسبها؟!

أحمد سعيد
 
من شهور خرجت الجموع تصرخ فى سلميه عشان تفوق الحكومة من الغيبوبة وتفكرهم ان هما بيحكومنا وبيحكموا البلد دى مش بلد تانية، البلد دى اللى تقريبا ناقصها كل حاجة وكفاية بقى العبث الى بيحصل فى المال العام، لان البلد دى محتاجة كل قرش عشان تقف على رجليها تانى، ومش محتاجة خالص اننا نربط رجليها بقرض يزود ديونها اكتر من كده، اللى فيها مكفيها، هو بس لو كل ترس دار فى مكانه هنلاقى الفلوس نزلت علينا من السما وبتمطر دولارات، ولكن دا فى حالة واحدة بس لو الحكومة بتشتغل لصالح البلد، وبشكل واعى وممنهج وتفكر فى تحسين وضع المواطن مش تفكر ازاى تضغط عليه اكتر، وتطعنه بالغلاء، وتسحله بالضرايب، وبعد كل دا مستغربين ليه الناس بتخرج تعمل مظاهرات وتصرخ فى الشوارع، الحكومة كل تفكيرها انها تعمل قانون يخلى الناس تقعد فى بيوتها ومتعملش مظاهرات غير باذنهم، لكنهم عمرهم ما فكرا يعملوا قانون يحاسب الحكومة على ادائها، كل القوانين بتصدر عشان تحاسب الشعب على اعتراضه المشروع والسلمى.

 
مستنيين ايه لما تقابلوا رغبات الناس بودن من عجين؟، لما الشعب يطلع من هدومه ويعبر عن غضبه المكبوت؟، الشعب زى الاطفال.. لو عايزين تتعاملوا معاه على كده هيسوق فيها، هيطالب فى البداية بالراحة وبعدين يرفع صوته وبعدين يرفعه اكتر واكتر ولو محدش حقق له مطالبه هيصرخ ويضرب الارض برجليه وشوية ويبدأ فى التكسير، اوعوا تتعاملوا مع الناس على انهم اطفال سذج وبعدين تحسبوهم على افعالهم، انتوا الى تربيتكم غلط مش هما الى تربيتهم مطمرتش، حاسبوا نفسكم 100 مرة قبل متحاسبوا الناس، لو عندكوا رغبة حقيقة انكم توقفا الفوضى والعنف حققوا العدالة، لو عندكوا رغبة تعيشوا فى امان وتمروا على الناس فى حب وسلام مش فى حرس وعربيات مصفحة حققوا السلام، خلوا الناس تحب افعالكم وصراحتكم، مش تكدبوا عليهم وتحسسوهم انكم بتتعاطفوا وتمنوا عليهم.
 
امتى يصدر قانون واحد يحاسب الحكومة على تركها للناس فى الشوارع لحد ما صعدوا للعنف، امتى يصدر قانون يحاسب المسئولين على تقصيرها فى حق المواطن؟!!، امتى يصدر قانون لمحاسبة الحكومة لما نلاقى الاعتراض والتظاهر ملا الشوارع لفشل الدولة على تحقق مطالب الناس، ومواجهة فشلها بقمع الناس وتخوفهم وتعقدهم ومحاولة حبسهم فى بيوتهم؟، امتى يصدر قانون يخللى كرامة المواطن قبل شكل وهيبة الوزير؟.
 
لو زعلان اوى وشاغل بالك فين هيبة الدولة؟، وإيه منظرها قدام العالم لما يتهاجم قصر رئيسها؟!! اسأل الاول عن شكلها ومنظرها لما ينام ولادها على سلالمها؟.