الخميس 28 مارس 2024
رئيس مجلس الإدارة
هبة صادق
رئيس التحرير
احمد باشا

يامنة







 
والله وشبت ياعبد الرّحمان
عجّزت ياواد ؟
مسرع..؟
ميتى وكيف ؟
عاد اللى يعجّز
فى بلاده
غير اللى يعجّز ضيف.
هلكوك النسوان؟
شفتك مرة فى التليفزيون
ومرّة ورّونى صـــــــــــــــورتك فى
الجورنان
قلت:كبر عبد الرحمان !!
أمّال أنا على كده مت
بقى لى ميت حول.!!
والله خايفة ياولدى القعدة تطول .
مات الشيخ محمود
وماتت فاطنة أب قنديل.. واتبـــاع
كرم اب غبّان!!
وانا لسّه حيّة وباين حاحيّا كمان
وكمان ..!!
عشت كتير
عشت لحد ماشفتك عجّزت ياعبد
الرحمان .
وقالوا لى قال: خلّفت
وانت عجوز خلّفت ياخــــوى؟
وبنات؟
أمّال كنت بتعمل ايه طيلة العمر
الفات ؟
دلوقت مافقت؟
وجايبهم دلوك تعمل بيهم ايه ؟
على كل أهى ريحة من ريحتك ع
الارض
يونسوا بعض
ماشى ياعبد الرحمان!!
عبدالرحمن الأبنودى