مذكرات شاب عنده أمل

امبارح وانا بعذوبتى سارح كان عمرى عشرين، والنهاردة انا عمرى 35، آه صدقونى، انا هحكيلكوا الموضوع، من يومين كدا امى ادتنى ساندوتش.. قالتلى اوعى ترجع بيه وكله فى الفسحة
، واول ما افتكرته جرس المرواح ضرب، روّحت اعمل الواجب لانى بقيت فى ثانوية عامة، قلت انا لازم ادخل طب زى ما بابا كان عاوز، لسه هفتح كتاب الفيزياء النتيجة طلعت ودخلت كلية آداب، واتعرفت على بنت جميلة واول ما قررت اصارحها اتخرجنا.. قررت اشتغل رحت قاعد ع القهوة، واول ما قررت اشرب ينسون مش حلبة القهوجى جه وقالى بعد إذنك الحساب يا استاذ عشان عاوزين نقفل، قررت اتجوز فقلت أقدم فى وظيفة زى خلق الله، ماقبلونيش، بس قالولى نصيحة لوجه الله ابقى خد كورسات لغة وكمبيوتر، فسألت على أرخص كورس طلع كورس طبيخ، قلت مش مشكلة اهو اكيد هينفعنى فى الـ (C.V)، فرجعت وقدمت فى نفس الشغلانة قالولى لا كدا تمام خريج اداب ومعاك كورس طبيخ احنا نعينك عندنا مندوب مبيعات، جريت جرى على اول محل ورد اشترى بوكيه عشان اروح اتقدم بقى واول ما رنيت جرس الباب لقيت ابنها بيفتحلى فجريت بصراحة قبل ما يطلعلى بقى جوزها بالفانلة الحمالات والشورت والسكينة، لقيت نفسى فاضى قلت اروح أقدم فى نفسى بلاغ كيدى وإزعاج للسلطات فالظابط قرر يدفّعنى غرامة، ومكانش معايا يوميها يكمل فأديتله بوكية الورد، قاللى: هات اهو ابقى اديه للوليه ولا اطلع بيه طلعة رجب السنة دي، افتكرت ان النهاردة عيد ميلادى قررت اكافئ نفسي.. روحت اشتريت دستة جاتوه، فسمعت الرجل بتاع الجاتوه بيقول النهاردة افتتاح مباريات كاس العالم، قلت اجرى ع البيت بقى يمكن الحق اتفرج ع النهائي، لا لا المرة دى اتفرجت فعلا بس كنت ناسى ان مباريات البطولة دى مشفرة اساسا، فاتفرجت على فيلم مش فاكر حتى اسمه، الفيلم خلص.. والجاتوة خلص.. لقيت نفسى لسه زهقان فكتبتلكوا الكلمتين اللى انتوا بتقروهم دول وأنا عندى أمل كبير فى ان بكرة هقدر اعيش زى ما انا مقرر بس يمكن ساعتها يكون الوقت فاتني. دعواتكوا.