الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

مفيش فايدة .. كلنا «خالد سعيد» وكلهم «حسني مبارك»




لسان حال شباب مواقع التواصل الإجتماعي من الحاشدين ليوم التمرد 30 يونيو المقبل في رصد انجازات أول رئيس ما بعد الثورة.. لم يخل من مقارنة انجازات مرسي بمن سبقوه في حكم مصر «عبدالناصر والسادات والمخلوع» بانجازاته.. وجسدها الشباب في مشهد حوار بين سائق تاكسي وزبونة:
 
«الست ما كانش عاجبها ان السواق بيلعن ويشتم في كل حاجة في البلد، وبمجرد ما جاب سيرة مرسي.. قالتله بمنتهي القرف الراجل حيعمل ايه؟ كان الله في عونه مع كل الفساد والسرقة والخراب والمشاكل اللي لقاها في البلد، والابقاق المفتوحة ليل نهار بتقول هات» بس يا سيدي ودي كانت بداية انفجار السواق اللي لف وكان حيعمل حادثة ووقف العربية و قال لها:
«لا مؤاخذة يا مدام، لما الأستاذ مرسي جه مع أهله وعشيرته علشان يتقدم للحاجة مصر، محدش ضحك عليه، و كان عارف كل ظروفها وعارف انها متجوزة قبله 3 رؤساء، و خلفوا منها عيال قد كده.. رامية نصهم علي القهاوي والباقي بيشموا كُلة في الخرابات وقالوا له إن عندها أمراض متلتلة وبتشخر وهي نايمة.. رايد يابن الحلال؟ الراجل كان رايدها وحارب علشان ياخدها.. ييجي بقي بعد ما يكتب الكتاب.. ويمضي علي عقد معاينة نافي للجهالة.. يقول دي طلع فيها وعليها؟ يا أستاذة محدش ضحك عليه.. محدش قال له حنجوزك نانسي عجرم ويوم الدخلة صحي لقاها سيدة العمشة.. وبعدين مع احترامي لسيادتك لو حضرتك حسبتيها صح.. مرسي اللي ضحك علي مصر.. لما اتقدملها قال انه دكتور ومهندس وبتاع فضاء وحيهنيها ويشبعها.. وهما شهرين لقيناه بيقول.. لما القرد يموت، القرداتي حيعمل ايه؟ وماشي يقول انه انضحك عليه.. طيب ما بتوع المعارضة بيقولوا له طلقها.. مش عايز ليه؟.. اهم حيرفعوا عليه قضية خلع علشان ما بيقيمش حدود الله معاها، وهاجر المعارضة في الفراش.. هو حضرتك نازلة هنا ولا مستنية النهضة زينا».
وتنوعت ردود أفعال النشطاء وتعليقاتهم علي القصة الأكثر انتشاراً علي مواقع التواصل الاجتماعي:
مرسي أول رئيس ملتحي.. أول رئيس بيصلي الجمعة.. أول رئيس بيصوم اتنين وخميس.. أول رئيس يعمل اجتماع سري علي الهوا.
سؤال التعبير اكتب فيما لا يزيد عن صفحتين ما أنجزه أول رئيس بعد الثورة؟ العيال ولاد الإخوان هيكتبوا كتاب إنجازات مرسي كله.