واحة الشعر

يسيل بجوار النيل فى بر مصر نهر آخر من الإبداع.. يشق مجراه عبر السنين والأجيال داخل نفوس المصريين.. فى سلسلة لم تنقطع.. وكأن كل جيل يودع سره بالآخر.. ناشرين السحر الحلال.. والحكمة فى أجمل أثوابها.. فى هذه الصفحة نجمع شذرات من هذا السحر.. للشعر.. سيد فنون القول.. الذى يجرى على ألسنة شابة موهوبة..

 شارك مع فريق «روزاليوسف» فى تحرير هذه الصفحة بمشاركتك على  [email protected]
 

بستانى
 

ينتظرُ شروقَ الشمس

أيتها المهرةُ

يا امرأة أساطير الجن

ضُميني

لمى شَعْثَ حروفي

فأنا بستانيٌّ

يعشقُ كل تراب أزاهيرك

ويذوب

يذوبُ

كدرويشٍ فى كل تفاصيلك!

ضميني

لن يرهبنى الحراس

هنا

وهناااااااااااك !  

ضميني

فأنا الناسكُ..

فى حضرتك..

وإن داهمك غياب !

ضميني

يتبدد جيش عنائى

ضميني

تنفرط عذاباتي

ضميني

فأنا منذ زمانٍ غابرٍ

بستانيٌّ يتسلَّحُ بالصبر

وينتظر شروق الشمس !
 
شعر: محمود مغربي

 
يا شام
يا مهرة العرب
 
 
يا شامُ الخلد لا ترحلى

فنعيق البوم لا يدوم

وتبقى أبوابك العتيقة منحوتة فى قلب السما

تعانق ملائكة الحب

ورسل العشق الأبدى

يا شامُ ابق أبية كما عرفناكِ

كل الخوارج ينتظرون رحيلك من عيوننا

وسيوف الحجاج تلمع فى الافق

يا شام الخلد لا ترحلى

المطر يغسل حواريكِ العتيقة

وسوق دمشق يبكى

أين بضاعتى ...

والنخاسون يبتلعون الصمت

والجوارى لأمير المؤمنين تنتظرن

يا شام لا تبكى ...

فدموعك دموع الالهة

يا شام سيرحل من جاء

على حصانه الاسود

وتبقين مهرة للعرب


شعر: هشام نوح
 
بحبك موت
 


انا المكتوب على جبينه هواكى يفوت

وانا اللى الشعر من عينه كلام ف سكوت

نطقتك شعر ف سكاتى بأجمل صوت

يا نوتة لحن دقاتى بحبك موت

يا شجرة توت وطرحت احلى غنواتى

بحب التوت

بحبك قلب ف حنينه بحور وشطوط

واحبك بحر من طينه بيطرح قوت

يا عقد ياقوت ف رقبة عمرى وسنينه

كأنه الشمس منور يومى بالفرحة

وجايب بكره بالطرحة

يا أجمل أمس بحبك لمس

ف إيدينه الغرام محطوط
واحبك همس ف أنينه يبان مبسوط

بحب كل شىء فينا

بحب هوانا بحب الحيرة ف خصامنا

واحب الغيرة ف كلامنا

بحب الفرحة ف سلامنا

واحب اللهفة ف لقانا

ما فيش ف العشق ما يدينه

ما فِهش شروط

بحبك دمعة ننساها

واحبك لوعة دوقناها

واحبك دنيا نحياها

واحبك موت.!


شعر - عبدالتواب محمد

 
افرِد حـُطامـَك لـِلْوَجـَع 
 



افرِد حُطامَك لِلْوَجَع 

هيئ حصونَك للضياع

عاشق فى روحَك تِتخدَع

مركب

طواهْ يأس الشراع

مِدّ فْ رحَابَك أسئلة

وانسى تلاقى الأجْـوبَة

سَلِّم إيدين حِلْمَك

لأنياب السِباع

ودَّع سنين الحب والشوق والمَتَاع

وانسى اللى باع

مابَقَاش يساع الليل لأمثالك خلاص

أصل الخلاص انك تموت من غير تمن

عايش

كإنك مش هنا !

هامش

على جْدار الزمن

مابَقاش يهِمّ انك تعيش

ما هو أصل عُمرَك .. مايساويش

جَــرَّب تكون غيرَك فى يوم

يمْكِن ف كِدْبَة للحياة تنسى الهموم بس افتكر:

إنك تموت علشان مبادءك كل يوم

أشرف كتير انك ف بحر من الخيانَة سنين تعوم

أشرف

من الوهم اللى قال ان الكرامَة تِتْخِدِش

لو ينزعوا عنها الهدوم

تِزأر فى وشّ الحق جوّاك تِرْعِبُه ؟

وتْسَكِّـنُهْ كَهف لأفاعى تْسَمِّـمُه بْخوف تِرهِبُه ؟

خايف لَتِطْلَع من عينيهْ شَمس الحقيقة وْ تِحْرَقَك

خايف

لَنورْها يْفـوَّقَــك

من يَمّ زيفَك .. يلْحَقَك

يغسِل عينيك اللى استباح الملح فيها رؤيتَك

فينْ نـيّـتَـك ؟

حِنّــيّــتَـك ؟

فين الصلابة والأمل ؟

فين حِكْمِتَك ؟

عَقْلَك دا زيّ الموج .. قَوي

قَــوِّم رياحَك ..بالقوي

وافْرِد جِناحَك فى السما

واصْدَح بألحان عِزّتَك

صدّقنى مش لايق عليك توب القلق

ولا عُمْرُه لاق انّك فى خوفَك .. تِنْدَلَق

حَرّر حُصانَك وانْتِفِض ..

وايّاك تقول : فات السَبق

وايّاك تصدَّق كِدْة الموت فى الغروب

وتْدارى ضَعْفَك وانهزامَك بالهروب

بَطَّل سذاجَة وقولْ لِى إيه يعنى الشَفَق ؟

ياللى انْكسارَك من تباريحَك .. شَفَق

زَهْو انتصارَك مُستحيل يبقى فْ نَفَق

إفهم ياريت ان الشَفَق مش مُنتهى

ياللى انتَ غاوى تِكْسى أحلامَك .. غَسَق

حُمْرِة عيونُهْ فى السّما

هيَّ المخاض اللى انْعَتَق مِنُّه الفَلَق

وطيور كتيرَه مْسَبّحَة بْحَمد البَديع اللى خَلَق

ربّك وقاسِم دُنـيـتَـك مادِد فروعَك

مِن عَلَق

حاسب وكاتب ضحكتك

حُزنَك ، وزخّات العرَق

قوم الْحَقَكْ مِن غـفْـلِتَك

عُمْرَك ساعاتُه بتتسَـرَق

لَمْـلِم بـقـايا مـرْكِبَك

وانشِل طموحك مِ الغرق

وابْدُر خطاوى سِكّتَك

بالنخل والنور والعَبَق

وان يوم سَبَقْ لَـحْـنَـك بُكاك

انسى الدموع

انسى الخضوع

انسى ان شوقك فيك شَرَق

وانسى البِدَع

واللى خَدَع

واللى لِأحْـزانُـه رَكَع

وايّـاك فى يوم الْمَح هواك

فارد حُطامَك للوجع
 

شعر - أحمد فؤاد هاشم
 

 
نجمة داوود



شفت الشوارع ارضها بتنزف حريق

الدمع دم يبكى عالطريق

وكام شهيد فين الصديق

فين اللى ماسكين الميزان

الظلم واقف ديدبان

بيّمرغ العدل فى ترابه

والعدل من شوقه وعذابه

ينده على جرس الكنايس والأدان

آه ياكلام اصبح صراخ

الحق دااااااخ

مابين مؤيد او معارض والفخاخ

منصوبة طلقات فى الدماغ

الكل سارع بالهتاف

والحية لسه بتنتقم

الحيه لفّت ديلها على كل الحواف

نجمة داوود شبعت دفا

من مين تخاااااااااااااف؟

مسنودة ورا ضهر اللى ساكته

من خيرها بتربى الكتاف

واللى قايدة للحرية شعلة

ترهب اللى شاف

فين الإيمان ايام ماكان؟

الاتحاد والقوة فينها والمقاومة

ثبّتوا جدور العزيمة بالمحاولة

دوسوا شياطين المقاولة

وابنوا سد من الامان

وارجعوا لايمان زمان

ارجعوا لايمان زمان .



شعر - وفاء أمين