الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

غانا العيد.. ورَوّح




إحنا لو حطينا تاريخ كل منتخب (مصر وغانا) على الكمبيوتر.. هيقول إننا نفوز 12 صفر.. لأنه ما يعرفش غانا.. دلوقتى بعد الـ6 الكمبيوتر عرفها.
على فكرة بقى... كاس العالم أصلاً حرام.. والكورة كمان حرام! 
على فكرة.. الجزيرة ممكن تتنازل عن حقوقها القانونية، وتكتفى بالعقاب الربانى.. الحرام أصلا ما بينفعش. 
أنا عرفت ليه الجزيرة ذاعت الماتش على المفتوح.. عشان تكمل مخطط تفكيك المنتخب المصرى. 
اللى حصل ده كله ذنب مجدى عبد الغنى.. عشان كنا بنتريق إنه جاب جون واحد.. بس على الأقل ما دخلش فينا 6 من هولندا.. مش من غانا.
أنا باقترح توفيرا للنفقات نلغى مباراة العودة.. وإلا هتكون إهدار مال عام.. واللعيبة دى لازم تختفى من البرامج والشاشات.. انتهى!
س سؤال: هو فى منتخب فى العالم لسه بيخسر 6!!؟؟
غانا لو بتلعب ماتش فى الحلم مش هتعمل كدا. 
إحنا عمرنا ما هنشوف كاس عالم.. دا إحنا لو بنلعب على صندوقين حاجة ساقعة.. كنا غلبنا. 
إكرامى خرج مش عشان مصاب.. إكرامى كان خايف الشيلة تبقى تقيلة عليه لوحده!!!
فى علامة استفهام كبيرة.. أكبر من أحمد شديد قناوى.. بسبب الإصرار على مشاركته مع المنتخب.
وسط الملعب عندنا مهزوز حبتين.. هزة يمين وهزة شمال. 
إحنا آسفين يا غانا. 
قناة الجزيرة.. مستضيفة السنغالى.. خليلو فاديجا عشان يتكلم عن غانا!!
الهتاف الجديد: خط دفاعنا دا مش خط.. دا خط مرسوم على الأرض.
كانوا بيقولوا كعبنا عالى على غانا.. الكعب اتكسر.
غانا العيد أهو غانا العيد.. روح خلاص العيد.
لقد هُزمنا يا أبوزيد.. هُزمنا.. هُزمنا!!
منتخبنا رجع من كوماسى بسداسى.
قبل الماتش كانوا عاملين تنبؤ بالنتيجة.. والبقر كان هو الحيوان المستخدم فى التنبؤ.. بعد الماتش اتأكدت أنه كان بقر فعلا!
ليه يا«غانا» ما سبتناش أبرياء.
الصراحة غانا تستحق.. بس أنا افتوجئت!
بعد الماتش.. السجاير ما بقاش ليها طعم.
منتخبنا لو كان فاز كنا هنشيلوا على الأكتاف.. عموما كدا كدا هنشيلوا.. بس على خشبة.
حد يصحينى.. الكابوس مش عاوز يخلص!
 مصر كلها فرحت بالجول الخامس أكتر من الجول بتاع أبوتريكة.. الشعب بقى فاهم فى كل حاجة!
السؤال الآن: برادلى هيلاقى لعيبة يلعب بيها ماتش العودة.. أنا باقترح يعمل إعلان يطلب متطوعين!